Beıbarys Sultan týraly entsıklopedııa shyǵarý josparda bar – Darhan Qydyráli

KAIR. QazAqparat - Aldaǵy ýaqytta Sultan Beıbarys týraly úlken entsıklopedııa shyǵarý josparda bar. Bul týraly búgin Mysyrdyń Kaır qalasynda Sultan áz Zahır Beıbarys meshitiniń ashylý saltanaty aıasynda jýrnalısterge suhbat bergen QR Aqparat jáne qoǵamdyq damý mınıstri Darhan Qydyráli aıtty.

«Búgin Beıbarys sultannyń 800 jyldyǵyna arnalǵan halyqaralyq konferentsııa aıasynda «Baıbarys arab jáne túrik sultany» degen úlken kitaptyń tusaýkeseri ótedi. Buny Beıbarystanýǵa qosylǵan úlken úles dep oılaımyn. Bolashaqta Beıbarys jáne mámlúk murasyna qatysty úlken entsıklopedııa shyǵarý oıymyzda bar. Búgingi halyqaralyq konferentsııadaǵy barlyq aıtylǵan pikirlerdi, jazbalardy jınaqtaýdy da josparlaımyz. Ony túrli tilderde shyǵarý da oıymyzda bar. Sondyqtan da, Beıbarystyń 800 jyldyǵy Beıbarystaný úshin jańa beles bolmaq», - dedi mınıstr Darhan Qydyráli.

Onyń aıtýynsha, konferentsııa aıasynda tusaýy kesiletin kitapty Mehmet Tútinshi degen belgili túrik ǵalymy jazyp, eýropalyq Beıbarystanýshylar da úles qosqan. Sırııa, Iordanııa, Palestına men basqa da elderdegi Beıbarys sultanǵa qatysty jazbalar, muralar jınaqtalǵan.

«Osy muralar túsinikti tilmen basylyp shyqty. Bolashaqta qazaq tilinde de shyǵatyn bolady. Árıne, Beıbarystyń týǵan jerin, ósken ortasyna qatysty tyń derekter de barshylyq. Sultannyń saldyrǵan ǵımarattary da, qaldyrǵan muralary da mol. Beıbarys Mysyr elinde ǵana emes, Sırııada, Qudysta, Taıaý Shyǵysta óte kóp mura qaldyrǵan. Sondyqtan da, ony «Eki qubylanyń qyzmetshisi», ıaǵnı Mekke men Qudystyń qyzmetshisi dep ataǵan. Dáýit paıǵamdardyń keshenderin jóndegen. Kóptegen paıǵambar, sahabalardyń beıitterin qalpyna keltirip, meshitter, medreseler salǵan. Solardyń barlyǵynda da barystyń sýreti men Beıbarys týraly málimetter qaldyrylǵan», - dedi Darhan Qydyráli.