«Beıbarys» HK-nyń bas jattyqtyrýshysy klýbtan ketti
ATYRAÝ. QazAqparat - «Beıbarys» hokkeı klýbynyń bas jattyqtyrýshysy Aleksandr Istomın óz erkimen otstavkaǵa ketti, dep habarlaıdy «QazAqparat» tilshisi.
«Bas jattyqtyrýshy Aleksandr Istomın jáne aǵa jattyqtyrýshy Oleg Bolıakınmen kelisimshart olardyń jumystan óz erkimen ketý týraly ótinishterine sáıkes buzylady. Bas jattyqtyrýshynyń mindetin atqarýshysy retinde Vladımır Klınga taǵaıyndaldy», - dep habarlady «Beıbarys» HK-nyń dırektory Rýslan Mýrzabaev.
Eske sala keteıik, Aleksandr Istomın qyzmetinen ketkenshe 2009 jyly negizi qalanǵan «Beıbarys» hokkeı klýbynyń birinshi ári jalǵyz bas jattyqtyrýshysy bolǵan. Klýb úsh márte el chempıony, eki ret kúmis júldeger atanǵan jáne eki ret Qazaqstan Kýbogynyń fınalyna shyqqan, al 2016-2017 jyl maýsymynda Kontınentaldyq Kýbokta kúmis júldege ıe boldy.
Bas jattyqtyrýshynyń qyzmetten ketý sebepteriniń biri - sońǵy matchtardaǵy tómen kórsetkishter. 
