Beıbarys Qablan: Aldaǵy ýaqytta da Qazaqstan týyn jelbiretkim keledi
ASTANA. KAZINFORM - Kazinform tilshisi taekvondodan 21 jasqa deıingiler arasynda álem chempıony atanǵan Beıbarys Qablandy áńgimege tartqan edi.
- Beıbarys, altyn júldeń qutty bolsyn. Elimizdiń atynan mundaı bıikten kóringen alǵashqy sportshy atanǵanyńdy bilemiz. Alǵan áseriń qandaı?
- Árbir dúbirli doda aldynda erekshe sezimde bolatynyń belgili. Joǵary tabysqa qol sozýdy qalaısyń. Sol maqsatta uzaq ýaqyt boıy ter tógýge týra keledi. Qazir kóńil kúıim óte keremet. Jospardy oryndaı bildik. Tuńǵysh álem chempıony bolǵanyma qýanyshtymyn.
- Álem chempıonaty aldynda daıyndyq barysy qalaı ótti?
- Qashanda sportshy árbir jarysqa tyńǵylyqty daıyndyq júrgiziledi. Bapkerler bizdiń sheberligimizdi jetildirýge kóńil bóldi. Fızıkalyq daıyndyq barysyn da nazardan tys qaldyrǵan joq. Sondaı-aq buǵan deıingi qatelikterge qatysty jumys isteı bildik. Nátıjesinde dúbirli dodaǵa joǵary daıyndyqpen keldik.
Árbir jekpe-jekte sol úırengen ádis-tásildi óz deńgeıinde oryndaýǵa múmkindik bolǵanyna qýanyshtymyn. Qarsylastyń osal tusyn taýyp, upaı qoryn molaıtýǵa qol jetti. Bul tóreshiler tarapynan oń baǵalandy. Men fınalǵa deıin Úndistan, Túrkııa eliniń sportshylarymen kezdestim. Al jartylaı fınalda Iran ókili Ashrafı Amırmohammadtan 2:1 esebimen basym tústim. Qarsylastarym osal bolǵan joq. Bapkerler aqyl-keńesin aıtty. Sol keńesterin buljytpaı oryndaýǵa tyrystym. Jeńiske degen jigerimniń arqasynda barlyǵyn tize búktirdim. Jankúıer senimin aqtaǵanyma qýanyshtymyn. Aldaǵy ýaqytta da Qazaqstan týyn jelbiretkim keledi.
- Álem birinshiliginde qaı qarsylasyń sen úshin qıyn boldy?
- Qarsylastarymdy bólip-jara almaımyn. Qaı-qaısysy da qoldaǵy múmkindigin múlt jibermeýge tyrysty. Degenmen ırandyq sportshy saıys barysynda edáýir qarsylyq kórsetkenin jasyra almaımyn.
- Jarys barysynda qandaı sezimde boldyń?
- Jeke bapkerim Serik Sadyqov maǵan saıys aldynda aqyl-keńes aıtty. Qarsylastardyń osal tusyn aıtyp turdy. «Eshbir ýaıymdamaı, óz oılaǵanyńdy júzege asyrýǵa tyrys» dedi bapkerim. Osylaısha ol kisi meni jigerlendirip otyrdy. Qýanyshtysy, barlyǵy óz deńgeıinde oryndaldy. Árbir ádis-tásil júzege asty. Men jeńis tuǵyryna qadam bastym. Bul - men úshin erekshe oqıǵa. Dúnıejúzilik dodada elimniń abyroıyn asqaqtatqanyma qýanyshtymyn. Aldaǵy ýaqytta sol jeńisti jolymdy jalǵastyrǵym keledi.
- Eresekter arasynda ótken álem birinshiliginen keıingi qysqa ýaqyt ishinde daıyndyq qalaı ótti?
- Qysqa merzim bolsa da, barlyq kúsh-jigerimdi jınap, sporttyq babymdy joǵaltpaı, kerisinshe odan ári shyńdaı aldym. Kúndelikti jattyǵýlar, fızıkalyq jáne taktıkalyq daıyndyqqa erekshe kóńil bólindi. Qazir óz nátıjeme qarap, sol qajyrly eńbek pen tabandylyqtyń zaıa ketpegenin baıqap otyrmyn.
- Qazir álemde taekvondo sportynyń damýyn qalaı baǵalaısyń?
- Jer-jahanda sporttyń bul túri keńinen damyp keledi. Ony halyqaralyq jarystarǵa barǵan sátte baıqap júrmiz. Qaı elden kelgen sportshy bolsyn, saıys barysynda jeńisti qoldan bergisi kelmeıdi. Shıraq qımyldap, upaı qoryn molaıtýǵa tyrysady. Bul taekvondonyń erekshe qarqynmen damyp kele jatqanyn aıǵaqtaıdy. Bul sport túri Olımpıada oıyndarynyń tizimine engizilgen. Sondyqtan aldaǵy ýaqytta da keńinen damı túsetinine senimim mol.
Básekelestiktiń joǵary bolǵany sportshy úshin óz septigin tıgizedi degen senimdemin. Óıtkeni árbir jekpe-jekke degen jaýapkershilik artady. Tyńǵylyqty daıyndyq qajet bolady. Nátıjesinde sol synnan súrinbeı ótken jaǵdaıda jeńis tuǵyrynan kórinýge múmkindik týady.
- Jarys barysynda qandaı ádis-tásildi qoldana bildiń?
- Bapkerler árbir saıys aldynda qarsylastardy muqııat zerttedi. Soǵan baılanysty ádis-tásildi qoldana bildik.
- Jankúıerler qoldaýyn qanshalyqty sezine aldyń?
- Shynyn aıtaıyn, maǵan qoldaý bildirgen adamdar sany az bolǵan joq. Ony tolyq sezindim desem bolady.
- Alda qandaı jarystar kútip tur? Sál demalyp alatyn shyǵarsyń.
- Bizdi aldaǵy ýaqytta kóptegen jarys kútip tur. Sondyqtan demalysqa ýaqyt joq desek te bolady. Tyńǵylyqty ázirlikti jalǵastyra beremiz.
- Budan buryn eresekter arasynda álem chempıonatynda baq synaǵanyńdy bilemiz. Odan keıin jańa jarysqa daıyndyq qalaı júrgizildi?
- Qysqa merzim bolsa da qalpyma kelýge tyrystym. Barlyq kúsh-jigerimdi jınadym. Sporttyq babymda bolýǵa tyrystym. Kúndelikti jattyǵý, fızıkalyq jáne taktıkalyq daıyndyqqa mán berildi.
- Otbasyń jaıly aıta ketseń.
- Men taekvondo sportyna qadam basqanda otbasymda eshkim qarsy bolǵan joq. Dese de úlkender bul jolda qanshama ter tógýge týra keletinin eskertti. Árbir jarystan oralǵan sátte týǵan shańyraqtaǵy jaqyn jandardyń erekshe kóńil kúıin kórgende qanattana túsemin. Dúbirli dodaǵa attanar aldynda olardyń aq batasyn alýǵa tyrysamyn. Otbasymnyń tarapynan únemi qoldaýdy sezinemin. Bul meni jańa jetistikterge jeteleıdi. Otbasymda men eń kishisimin.
- Suhbatyńa raqmet. Aldaǵy ýaqytta tolaǵaı tabystar tileımiz.
Sondaı-aq Qazaqstandyq sportshy Batyrhan Tóleýǵalı (87 keli) Naırobıde (Kenııa) ótken taekvondodan (WT) 21 jasqa deıingi sportshylar arasynda álem chempıony ataǵyna qol jetkizdi.