«Beıbarys» hokkeı klýbynyń oıynshysy Máskeýde qaıtys boldy

ATYRAÝ. KAZINFORM — Atyraýlyq «Beıbarys» hokkeı klýbynyń oıynshysy Oleg Gofman oqys oqıǵa saldarynan ómirden ótti. Ol — «Dınamo» (Máskeý) komandasynyń túlegi.

Bul derekti «Beıbarys» hokkeı klýby baspasóz qyzmeti rastady. 

— «Beıbarys» hokkeı klýbynyń oıynshysy Oleg Gofmannyń ómirden ótkenin habarlaımyz. Ol sońǵy eki maýsymda bizdiń komandanyń namysyn qorǵady. Ol bizdiń jadymyzda senimdi qorǵaýshy, laıyqty tulǵa retinde máńgi saqtalady, — delingen klýbtyń baspasóz qyzmeti taratqan aqparatta.

Oleg Gofman 2001 jyly týǵan, Reseı azamaty. Boıy — 180 sm, salmaǵy — 80 keli. «Dınamo» (Máskeý) komandasynyń jastar quramasynda 166 oıyn ótkizgen. Osy komandanyń quramynda 2021 jyly Harlamov kýboginiń ıegeri atanǵan.

Reseılik BAQ-tyń málimetine qaraǵanda, Oleg Gofman keshe, 18 mamyrda ómirden ótken. Onyń ómirden ótýine oqys oqıǵa sebep bolǵan. Naqtylaı aıtqanda, Máskeý qalasynda 6-qabattaǵy balkonnan qulaǵan. 

Eske sala keteıik, buǵan deıin Sharm-esh-Sheıh áýejaıynda úsh qazaqstandyqqa jarnama taqtasy qulaǵany habarlanǵan edi.