Beıádep sóz aıtqan: Astanada Instagram-daǵy beınejazbasy úshin er adam qamaýǵa alyndy
ASTANA. KAZINFORM — Áleýmettik jelilerge júrgizilgen monıtorıng barysynda quqyqqa qaıshy beınejazba anyqtaldy. Instagram áleýmettik jelisinde er adam qoǵamdyq orynda beınejazba túsirý kezinde balaǵat sózder aıtyp, qoǵamdyq tártipti buzǵany belgili boldy. Bul týraly Polisia.kz saıty jazdy.
— Keıin ol atalǵan beınejazbany óziniń Instagram paraqshasynda jarııalap, quqyqqa qaıshy áreketin kópshilikke qoljetimdi etken. Polıtsııa qyzmetkerleri onyń jeke basyn jedel anyqtady, — delingen habarlamada.
Quqyq buzýshy 26 jastaǵy Baltash Shyńǵyshan bolyp shyqty. Ol 5 táýlikke qamaýǵa alyndy. Polıtsııa áleýmettik jelilerge turaqty túrde monıtorıng júrgizedi. Tártip saqshylary azamattardy qoǵamdyq tártipti jáne áleýmettik jelilerde ádep normalaryn qatań saqtaýǵa shaqyrady.
Aıta keteıik, buǵan deıin TikTok pen Instagram-da beıádep sóz aıtqan Almaty oblysynyń turǵyny qamaýǵa alynǵan edi.
