Betperde kıgen qaraqshylar otbasy múshelerine qarý kezep, tonap ketken
ShYMKENT. QazAqparat - Ońtústik Qazaqstan oblysynda betperde kıgen qaraqshylar tún jarymda jergilikti turǵynnyń úıine basa kóktep kirgen. Otbasy múshelerin qarýmen qorqytyp, baǵaly zattaryn alyp ketken, dep habarlaıdy QazAqparat tilshisi.
Oblystyq ІІD baspasóz qyzmetiniń habarlaýynsha, qylmystyq oqıǵa ótken jyldyń jeltoqsan aıynda Maqtaral aýdanyndaǵy aýyldardyń birinde bolǵan. Qaraqshylyq shabýyl jasaǵandar úı ıelerin qorqytý arqyly altyn buıymdary men 150 myń teńgesin qoldy etken.
Óńirdiń tártip saqshylary qylmysqa qatysy bar degen kúdiktilerdi ustady.
Olardyń biri buǵan deıin de qylmys jasaǵany úshin sotty bolǵany anyqtaldy. Qazirgi tańda atalǵan fakti boıynsha Qylmystyq kodekstiń «Qaraqshylyq» babymen is qozǵalyp, sotqa deıingi tergep tekserý amaldary júrgizilýde. Polıtseıler kúdiktilerdiń basqa da qaraqshylyq qylmystaryna qatysy bar-joǵyn tekserip jatyr.
