Betpaqdalada eki adam 700 keli esirtkimen ustaldy
Bul týraly oblystyq polıtsııa departamenti bastyǵynyń orynbasary, polıtsııa polkovnıgi Asyljan Qaldarbekov aıtty, dep habarlaıdy QazAqparat tilshisi.
Asyljan Qaldarbekovtyń aıtýynsha, kúdiktiler «Qarasora-2020» jedel-izdestirý is-sharalary aıasynda Sozaq aýdanynyń aýmaǵynda qolǵa túsken. Túrkistan oblysy PD Esirtki qylmysyna qarsy is-qımyl basqarmasynyń qyzmetkerleri Sozaq APB polıtseıleri jáne jergilikti qoryqshylarmen birge esirtkiniń iri partııasyn tasymaldaǵan «Toıota Land Krýzer» avtokóligin ustaǵan.
Jedel ýákilder kólikti tintý kezinde ishinen 37 polıetılen qapshyǵy men ósimdik tektes esirtki zattary bar birneshe ydystardy tapqan. Saraptama qorytyndysyna sáıkes tárkilenip alynǵan esirtki zaty jalpy salmaǵy 650 keliden asatyn «keptirilgen marıhýana» jáne 48 kelige jýyq gashısh bolyp shyqty.Tergeý barysynda ustalǵan eki kúdiktiniń Nur-Sultan qalasy jáne Jambyl oblysynyń buryn sottalǵan turǵyndary ekeni anyqtaldy. Kúdiktiler esirtki salynǵan qapshyqtar men ydystardy aldyn ala daıyndap, Jambyl oblysynan shyqqany belgili bolǵan. Odan ári olar Sozaq aýdany arqyly jol boıyndaǵy aınalma joldarmen Qostanaı oblysyna qaraı ketýge árekettengen. Alaıda, Betpaqdala aýmaǵynda kólik júrmeıtin joldarmen jasyrynyp ketip bara jatqan kólikti qoryqshy baıqap qalyp, polıtsııaǵa habarlaǵan.
«Ustalǵan er adamdardy oqıǵanyń barlyq mán-jaıyn anyqtaý úshin Sozaq APB-ne jetkizdi. Atalǵan oqıǵa QR QK 297-baby 3-bóligi «Esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý nemese ótkizý» boıynsha tirkeldi. Qazirgi tańda kúdiktiler qamaýda». Búgingi kúni Túrkistan oblysynyń polıtsııa qyzmetkerleri kúdiktiler esirtkiniń iri partııasyn qandaı maqsatpen tasymaldaǵanyn, sondaı-aq bizdiń oblysqa esirtki quraldaryn jetkizý arnalaryn anyqtaýda. Sotqa deıingi tergeý amaldary júrgizilýde»,- dedi Asyljan Qaldarbekov.