Betpaqdalada adasyp ketken úsh júrgizýshi 4 táýlikten keıin tabyldy
SOZAQ. QazAqparat - Aqtútek boranda Bektpaqdalada adasyp qalǵan 3 júrgizýshi birneshe táýlikten soń tabyldy, dep habarlaıdy QazAqparat Túrkistan oblystyq polıtsııa departamentine silteme jasap.
26 qańtar kúni Sozaq aýdandyq polıtsııa bólimine Shymkent qalasynyń turǵyny habarlasyp, Qaraǵandydan Túrkistan oblysy arqyly aýyr júk kóligimen kele jatqan aǵasymen habarlasa almaı qalǵanyn aıtyp aryzdanady. Sozaq APB polıtseıleri aryzdy qabyldap, birden izdestirý jumysyna kirisedi. Aryzdanǵan azamattyń aǵasynyń janynda aýyr júk kóligimen jolǵa shyqqan taǵy eki er azamattyń bar ekeni belgili boldy.
Sozaq polıtseıleri aýa raıynyń kúrt nasharlaǵanyn eskere otyryp, qutqarýshylarmen jáne erikti jergilikti turǵyndarmen jol talǵamaıtyn kólikterge minip, borandy kúni adasyp qalǵan júrgizýshilerdi izdeýge attandy.
«Osylaısha tııanaqty júrgizilgen izdestirý jumystarynyń nátıjesinde 3 aýyr júk kóliginiń júrgizýshileri Betpaqdaladan tabyldy. Belgili bolǵandaı, olar Qaraǵandydan Sozaqtaǵy tóte jol arqyly Shymkenttegi úılerine ýaqyt únemdep, tezirek jetpek bolǵan. Alaıda aýa raıy ózgerip, qalyńdap jaýǵan qar men aqtútek borannyń kesirinen adasyp, kólikterimen omby qarǵa batyp qalǵan» delingen habarlamada.
Kómekke kelgen polıtsııa qyzmetkerleri jolǵa shyqpas buryn kólikke kerekti 400 lıtrdeı dızel janarmaıy jáne azyq-túlik alyp shyqqan bolatyn. Júrgizýshiler tabyla salysymen olarǵa azyq úlestirilip, qajetti kómek kórsetildi. Úsh júk kóligine de qajetinshe janarmaı quıylyp, jolǵa shyǵýǵa daıyn boldy.
Óz kezeginde aıazda adasyp qalǵan úsh azamat sheksiz alǵysyn aıtyp, rızashylyǵyn bildirdi.
Eske sala keteıik, Betpaqdalada úsh adamnyń adasyp ketkenin jazǵan bolatynbyz.
