Beton aralastyrǵyshta aıaǵy qysylyp qalǵan qurylysshy qutqaryldy

QONAEV. QazAqparat - Respýblıkalyq jedel-qutqarý jasaǵynyń kezekshi bólimine qurylys alańynda adamnyń aıaǵy qysylyp qalǵany týraly Almaty oblysy TJD-dan habar tústi. Qum tıeý jumystary kezinde 35 jastaǵy jumysshy súrinip qalyp, oń aıaǵy beton aralastyrǵyshta qysylyp qalǵan, dep habarlaıdy QazAqparat.

Respýblıkalyq jedel-qutqarý jasaǵynyń 5 qutqarýshydan qurylǵan jedel toby men Qonaev qalasy jedel-qutqarý jasaǵynyń 4 qutqarýshysy dereý oqıǵa ornyna bardy.

«Oqys oqıǵa Іle aýdanyndaǵy Geıt Sıtı yqsham aýdanynda bolǵan. Oqıǵa ornyna kelgennen keıin TJM qutqarýshylary bolgarkanyń kómegimen zardap shekken er adamnyń qysylǵan aıaǵyn bosatty, aıaǵy synyp ketken eken. Qutqarýshylar shok alǵan er adamdy jedel járdem brıgadasyna tapsyrdy. Jedel járdem brıgadasy ony birden aýrýhanaǵa alyp ketti», - dep jazdy vedomstvodan.

Qutqarýshylar qaýiptiligi joǵary obektilerde muqııat bolýǵa keńes beredi.