Betine úshkir temir qadalǵan 10 jasar balany qutqarǵan aqmolalyq dárigerler marapattaldy
QR Konstıtýtsııasy kúnine arnalǵan saltanatty sharada marapattalǵandar arasynda Aqmola oblystyq kópsalaly balalar aýrýhanasynyń dárigerleri – jaqsúıek-bet hırýrgi Denıs Fedorov, LOR dáriger Gúlnar Júnisova jáne neırohırýrg Nurjan Ysqaqov bar. Olar şýchelik 10 jasar balaǵa biregeı ota jasaǵan edi. Bala Şýche qalasynda úı aýlasyndaǵy fýtbol alańynda oınap júrgen kezinde jaraqat alǵan. Onyń betine, ıaǵnı kóz tusyna qorshaýdyń úshkir temiri shanshylyp qadalǵan. Dárigerlerdiń úılesimdi jumysy men kásibı sheberliginiń arqasynda balanyń betine qadalǵan bógde zat alyndy. Qazir ol saýyǵyp, úıge shyǵaryldy.
Sharada Gúlnar Júnisova Aqmola oblysynyń ákimi Ermek Marjyqpaevqa ujymdyq jumystaryn joǵary baǵalaǵany úshin alǵysyn bildirdi.
«Bul – bizdiń kúndelikti jumysymyz. Ár naýqastyń ómiri men densaýlyǵy biz úshin mańyzdy. Bizdiń kásibı ujym kún saıyn adam ómirine arasha túsedi. Bul is – sonyń jarqyn mysaly», - dedi ol.
Aıta ketsek, Şýchedegi fýtbol alańynda 10 jasar balanyń jaraqattanýyna qatysty qylmystyq is qozǵalǵan edi.
