Betbaqdaladaǵy kıikter popýlıatsııasy Qostanaı óńirine oralady
QOSTANAI. QazAqparat - 2015 jyly elimizdiń úsh aımaǵynda oryn alǵan betbaqdalada 150 myńǵa jýyq kıiktiń qyrylý oqıǵasynan keıin, janýarlar Qostanaı oblysynyń terrıtorııasyna qaıtyp oralady, - dep habarlaıdy «QazAqparat» HAA tilshisi.
2015 jylǵy pasterellezden jappaı qyrylýy kezinde janýarlardyń 61% joıyldy. Oblystyq orman jáne ań sharýashylyǵy ınspektsııasy basshysynyń orynbasary Selimhan Moldaǵulovtyń málimdeýinshe, bıylǵy jylǵy jaǵdaı aıtarlyqtaı ońalǵan.
«Biz Orman jáne ań sharýashylyǵy komıtetiniń tapsyrysymen kıikter esebi boıynsha jumys júrgizdik. Zertteý nátıjesi maýsym aıynda habarlanady. Alaıda, oblystar boıynsha aldyn-ala kóz mólshermen esepteıtin bolsaq, byltyrǵy jylmen salystyrǵanda jaǵdaı áldeqaıda jaqsy. Óıtkeni ótken jyldyń osy ýaqytynda oblys terrıtorııasynan biren-saran kıik baıqalsa, bıylǵy jyly janýarlardyń 15-20 basynyń top bolyp júrgenin ańǵaramyz», - deıdi Selimhan Moldaǵulov.
Sondaı-aq, mamandar óńirdegi janýarlardyń jappaı tóldeýin kútip otyr, bul naýqan basqa aımaqtarda áldeqashan bastalyp ta ketti.
«Batys Qazaqstanda jappaı tóldeý júrip jatyr. Qostanaı oblysynda bul úrdis ázirge keshigip jatyr. Buǵan aýa-raıynyń jaǵdaıy sebep bolýy múmkin. Janýarlardyń tóldeý naýqanyn asyǵa kútip otyrmyz», - deıdi oblystyq orman jáne ań sharýashylyǵy terrıtorııalyq ınspektsııasy basshysynyń orynbasary.
