Betasharda 4 mln teńge salǵan aqtóbelik depýtat tártiptik jazaǵa tartyldy
AQTÓBE. KAZINFORM — Aqtóbe qalalyq máslıhatynyń depýtaty Aslan Qaıyrǵalıevke mineý túrindegi jaza qoldanyldy. Depýtattyń ózi de beıneúndeý jarııalap, aıtylǵan syn-pikirdi qabyldaıtynyn jetkizdi.
Aqtóbe qalalyq máslıhatynyń depýtaty Aslan Qaıyrǵalıevtiń betasharda ortada turǵan sebetke qomaqty aqsha salyp turǵan sáti qyzý talqyǵa tústi. Toı kezinde túsirilgen vıdeoda onyń sol sátte 4 mln teńge salǵanyn aıtady. Osydan keıin kópshiliktiń oıy ekige jarylyp, shý týdy. Kóp uzamaı Aslan Qaıyrǵalıev áleýmettik jelidegi paraqshasynda vıdeoúndeý jarııalady.
— Bul meniń bala kezden birge ósken jaqyn dosymnyń toıy. Vıdeoda barsha dostarynyń atynan jınalǵan syılyqty tartý sáti kórsetilgen. Jigit joldas bolǵan soń syılyqty salý sáti maǵan usynyldy. Bul meniń óz qarajatym emes, barsha dostardyń atynan jınalǵan tartý edi. Sol jerdegi is-áreketim, ıaǵnı, aqshany sanaý sáti kózge oǵash kóringenin endi túsinip jatyrmyn. Bul jerde maqtaný, nazar aýdarý nıetim bolǵan emes. Jaı ǵana dosymnyń, jaqyn dosymnyń toıyndaǵy qýanyshty emotsııalyq sát qana bolatyn. Azamat retinde aıtylǵan syn-pikirlerdi tolyqtaı qabyldaımyn jáne aldaǵy ýaqytta mundaı is-áreketterge jol bermeımin, — dedi Aslan Qaıyrǵalıev óz úndeýinde.
Aqtóbe qalalyq máslıhaty osy oqıǵadan keıin komıssııa otyrysyn ótkizdi.
— Aqtóbe qalalyq máslıhatynyń depýtattyq etıka jónindegi komıssııasynyń sheshimine sáıkes qalalyq máslıhat depýtaty Aslan Qaıyrǵalıevqa mineý (porıtsanıe-red.) túrinde jazalaý sharasy qoldanyldy. Komıssııa Instagram áleýmettik jelisinde jarııalanǵan beınejazbalardy egjeı-tegjeı zerttep, ár komıssııa múshesiniń pikirin eskerip, osyndaı sheshimge keldi, — dep habarlady Aqtóbe qalalyq máslıhatynyń tóraǵasy Anar Darjanova.
Aıta keteıik, Aslan Qaıyrǵalıev Aqtóbe qalasynyń Máskeý jáne Bolashaq shaǵyn aýdandary atynan saılanǵan depýtat. Ol «Amanat» partııasynyń múshesi ári qalalyq máslıhattaǵy eń jas depýtat.
Buǵan deıin habarlaǵanymyzdaı, alaıaqtyq jolmen paıda tapqysy kelgen aqtóbelik depýtattar bas bostandyǵynan aıyryldy. Sot bes qabatty jataqhanany 8 mln teńgege satyp alyp, keıin ony Muǵaljar aýdany ákimdigine satpaq bolǵan depýtattardy aıypty dep tanydy.
