Betashar, qudalyq jasaǵan 35 túrkistandyq aıyppul tóleıtin boldy
TÚRKІSTAN. QazAqparat – Túrkistan oblysynda betashar, qudalyq, qyz uzatý syndy otbasylyq merekeler ótkizgen 35 adamǵa aıppul salyndy, dep habarlaıdy QazAqparat.
Oblystyq Polıtsııa departamentiniń baspasóz qyzmetinen málim etkendeı, karantın rejımi aıaqtalmasa da, shekteý sharalaryn elemeıtinder qatary azaıar emes. Jaqyndary men týystarynyń basyn qosyp, kópshilikke toı berip, jıyn jasap jatqandar áli de anyqtalýda. Oǵan qosa halyq kóp shoǵyrlanatyn oryndarda betperdesiz júrip, óz ómirin qaterge tigip júrgender de barshylyq.
Máselen, Otyrar aýdany Sháýildir aýylynda birneshe jergilikti turǵynnyń azyq-túlik dúkenine karantın rejımin saqtamaı kirgendigi anyqtaldy. Tártip saqshylary atalǵan jaıttardy QR Ákimshilik quqyq buzýshylyq týraly kodekske sáıkes tirkep, qujattardy zańdy sheshim shyǵarý úshin tıisti organdarǵa jibergen.
2020 jyldyń sońyna qaraı 253 tulǵaǵa ákimshilik hattama toltyrylǵan. Onyń ishinde jeke tulǵalar - 209, otbasylyq toı-jıyn jasaǵandar - 35 (betashar-17, qudalyq-10, qyz uzatý-4, kókpar-2, besik toı-1, as-1).
«Karantın kezinde toı-jıyndar, basqosýlar, otbasylyq, merekelik, ujymdyq is-sharalardy uıymdastyrýǵa tyıym salynǵan. Oǵan qosa betperdelik rejım men araqashyqtyqty únemi saqtaý mindetteledi», - dep eskertedi oblystyq PD.
