Bet-júzin jasyrǵan 1179 adam jaýapqa tartyldy - ІІM
ASTANA. KAZINFORM - Іshki ister mınıstrligi qoǵamdyq oryndarda azamattardyń bet-júzdi tanýǵa kedergi keltiretin kıimderdi kııýge tyıym salý talabyn saqtaýyn qamtamasyz etý jumystaryn júrgizip keledi, - dep habarlaıdy Polisia.kz.
Bul norma «Quqyqbuzýshylyq profılaktıkasy» zańynyń 75-baby 3-tarmaǵynda kózdelgen. Adamnyń túr-sıpatyn kózben tanýǵa kedergi keltiretindeı dárejede betti jabatyn kıimderdi kııý quqyqbuzýshylyq bolyp sanalady.
Tyıym aýa raıy jaǵdaılaryna jáne medıtsınalyq usynymdarǵa qatysty qoldanylmaıdy. Sondaı-aq qyzmettik mindetterdi atqarý, sporttyq jáne mádenı is-sharalarǵa qatysý kezinde de tyıym salynbaıdy. Jaýapkershilik Ákimshilik quqyqbuzýshylyq týraly kodekstiń 434-3-babynda belgilengen.
Atap aıtqanda, alǵashqy quqyqbuzýshylyq úshin eskertý qarastyrylǵan. Bir jyl ishinde qaıtalanǵan jaǵdaıda 10 aılyq eseptik kórsetkish mólsherinde aıyppul salynady. Qazirgi ýaqytta atalǵan quqyqbuzýshylyq boıynsha 1179 azamat ákimshilik jaýapkershilikke tartyldy.
- Tyıym tek qoǵamdyq qaýipsizdikti qamtamasyz etýge baǵyttalǵanyn jáne bet-júzdi jasyratyn kez kelgen kıim túrine qatysty qoldanylatynyn atap ótemiz. Іshki ister organdary Zań men Tártipti qamtamasyz etý jumystaryn jalǵastyryp, azamattardy qoǵamdyq oryndarda belgilengen erejelerdi saqtaýǵa shaqyrady, - dedi ІІM.
Osyǵan deıin Mańǵystaýda betin tumshalaǵan 50 shaqty adamǵa eskertý jasalǵany týraly jazdyq.
