Bet-júzin tumshalap júretin adamdardyń esebin júrgizbeımiz — mınıstrlik
ASTANA. KAZINFORM — Memleket basshysy bıyl Ulttyq quryltaı otyrysynda ulttyq kıimdi jan-jaqty dáripteý týraly aıta kele, bet-júzdi tumshalaıtyn qara kıimge qatysty oıyn ortaǵa salǵan bolatyn. Osy oraıda Kazinform Mádenıet jáne aqparat mınıstrligine saýal joldady.
Bet-júzin tumshalap, qara jamylyp júretin azamattardyń esebi týraly suradyq. Sondaı-aq «Mundaı kıimge shekteý qoıylýy múmkin be?» — degen saýal qoıdyq.
— Mınıstrlik bet-júzin tumshalap qara kıim kıetin adamdardyń tiziminiń esebin júrgizbeıtinine nazar aýdaramyz. Sondaı-aq, ashyq aqparat kózderinen Qazaqstan Respýblıkasy Parlamenti depýtattarynyń bet-álpetti tolyǵymen jaýyp turatyn dinı kıimderge tyıym salýǵa qatysty pikir bildirgeni belgili. Budan basqa, tıisti zańnamany jetildirý barysynda sizdiń tarapyńyzdan qoıylǵan suraqtar eskeriletinin atap ótemiz, — degen mınıstrlikten resmı saýalǵa jaýap aldyq.
Eske sala ketsek, elimizde sońǵy jyldary hıdjab máselesi jıi talqylanyp júr. Senat pen Májilis depýtattary da elimizde destrýktıvti dinı aǵymdar qarqyndy jumys júrgizip jatqanyn aıtyp, dabyl qaqty. Osy máseleni Kazinform tilshisi zerdelep kórgen edi.
Aıta ketsek, bıyl Býrabaıda ótken ulttyq quryltaıda Memleket basshysy Qasym-Jomart Toqaev bolmysymyzdyń mańyzdy kórinisi ulttyq kıimdi jan-jaqty dáripteý kerektigin aıtqan edi.
— Bet-júzdi tumshalaıtyn qara kıimnen góri ózimizdiń ulttyq kıimderimiz áldeqaıda artyq, — dedi Prezıdent.
Eske sala keteıik, Shveıtsarııada paranja men nıkab kııýge tyıym salyndy.