Bet-júzin búrkemelegenderge eskertý jasalyp jatyr - ІІM
ASTANA. KAZINFORM – Qazir polıtsııa bet-júzin tumshalap júretin adamdarǵa eskertý jasap jatyr. Bul týraly Іshki ister mınıstriniń orynbasary Sanjar Ádilov málim etti.
- Bul rette elde ákimshilik jaýapkershilik engizildi. Birinshiden, polıtseıler osy normaǵa qatysty turǵyndar arasynda túsindirý jumystaryn júrgizip jatyr. Qazir ákimshilik jaýapkershilik boıynsha 21 adam ǵana jazalandy, olarǵa eskertý jasaldy. Jalpy, bul norma boıynsha aıyppul eskerilgen. Zań kúshine engenine kóp ýaqyt ótken joq. Sondyqtan polıtsııa qazir eskertýmen ǵana shektelip jatyr. Aıyppul 10 AEK somasynda qarastyrylǵan, - dedi S. Ádilov Senattyń jalpy otyrysynan keıin tilshiler suraǵyna jaýap bere otyryp.
Eske salsaq, byltyr betin búrkemelegenderge aıyppul salýǵa qatysty qujat qabyldandy.
Qoǵamdyq oryndarda bet-álpetti tanýǵa kedergi keltiretindeı búrkemeleýge qatysty zań talaptaryn buzý áreketine ákimshilik jaýapkershilik engizildi. Alǵash ret zań talaptaryn buzǵany úshin eskertý jasalady, al bul jaǵdaı qaıtalansa, 10 AEK somasynda aıyppul salynady.
Bıyl sáýir aıynda Atyraýda bet-júzin búrkemelegen 11 adam jaýapqa tartylǵany habarlandy.
