Bet-júzdi tumshalaýǵa tyıym: ІІM dinı kıimderdiń qaı túrine tyıym salynǵanyn túsindirdi
ASTANA. KAZINFORM — Іshki ister mınıstrligi bet-júzdi tumshalaıtyn kıimderdi kııýge tyıym salý týraly jańa erejelerdi túsindirdi. Zańnamalyq túzetýler 12 shildede kúshine endi.
Endi qoǵamdyq oryndarda adamdy beınekamera arqyly taný múmkin bolmasa, bul erejebuzýshylyq bolyp sanalady.
Degenmen, bul shekteýdiń birqatar ereksheligi bar. Atap aıtqanda, zań talaptaryn oryndaý úshin, medıtsınalyq maqsatta, tótenshe jaǵdaılar kezinde, aýa raıy qolaısyz bolǵanda nemese sporttyq jáne mádenı sharalarǵa qatysqan kezde bet-júzdi jabatyn kıim kııýge ruqsat etiledi. Hıdjab sekildi betti jappaıtyn dinı kıimderge de bul tyıym júrmeıdi.
— Tyıym tek betin tolyq jaýyp turatyn jáne jeke basyn tanýǵa kedergi keltiretin kıimderge, sonyń ishinde balaklavalarǵa, betperde men nıkabtarǵa ǵana qatysty. Bul rette hıdjab, sheıla, hımar, ál-ámıra jáne basqa da dinı kıimderdiń betti jappaıtyn elementteri osy normanyń qoldanysyna jatpaıdy, — dedi QR ІІM Ákimshilik polıtsııa komıtetiniń aǵa ınspektory E. Qıyqov.
Eljas Qıyqov zańnamalyq túzetýlerdiń maqsaty — azamattardyń quqyqtary men bostandyqtaryna, sonyń ishinde dinı senim bostandyǵyna nuqsan keltirmeı, qoǵamdyq qaýipsizdik pen tártipti, tulǵalardy sáıkestendirý ekenin atap ótti.
Mundaı shekteý Ortalyq Azııada burynnan bar. 2023 jyly Ózbekstanda atalǵan shekteýmen mazmundas talap zań aıasynda qabyldandy. Ótken jyly Tájikstanda ulttyq mádenıetke jat dep tanylǵan kıimderdi kııý men satýǵa zań júzinde shekteý qoıyldy. Al bıyl Qyrǵyzstan adamnyń bet-álpetin anyqtaýǵa múmkindik bermeıtin kıim kııýge tyıym salǵan bolatyn.
Mınıstrliktiń habarlaýynsha, jyl basynan beri beınebaqylaý kómegimen 7 myńnan astam qylmystyq quqyqbuzýshylyq, 400 myńǵa jýyq ákimshilik quqyqbuzýshylyq anyqtalǵan.
Buǵan deıin betti tolyq jabýǵa qatysty Qazaqstan musylmandary dinı basqarmasy da málimdeme jasaǵan edi.