Bet-álpetti taný tehnologııasy: Astanada 20 myń ıntellektýaldy kamera ornatylady
ASTANA. KAZINFORM — Elordadaǵy beınebaqylaý ınfraqurylymy aýqymdy túrde jańǵyrtylyp jatyr. Bul týraly Astana ákimi Jeńis Qasymbek málim etti.
Sońǵy jyldary Astanada turǵyndarmen ózara is-qımyldyń birqatar ozyq sheshimderi engizildi. Qalalyq iKomek qyzmeti jylyna 2 mıllıonnan astam ótinish qabyldap, óńdeıdi. Bul — el óńirlerindegi barlyq osyndaı qyzmetterdiń jıyntyǵynan da kóp. Sonymen qatar, QalaQyzmet servısi turǵyndarǵa turǵyn úı-kommýnaldyq sharýashylyǵy salasynda 120 qyzmet kórsetip otyr (jyl saıyn 200 myńnan astam ótinish). «Sergek» jol qozǵalysy jáne qoǵamdyq qaýipsizdik salasynda ıntellektýaldy platforma quryldy, qoǵamdyq kóliktegi basqarý jáne tólem júıesi avtomattandyryldy, al Smart Astana mobıldi qosymshasy qala turǵyndary men qonaqtaryna 70-ten astam tsıfrlyq servısti bir ortalyqqa biriktirip otyr. Osy jumysty kúsheıtý úshin Memleket basshysynyń tapsyrmasyna sáıkes, bıyl elordada Birikken Arab Ámirlikteriniń Presight kompanııasymen birlesken strategııalyq Smart City jobasy júzege asyrylyp jatyr, — dedi J. Qasymbek Májilistegi parlamenttik tyńdaý kezinde.
Onyń aıtýynsha, jobanyń negizgi elementi jasandy ıntellektige negizdelgen Qalalyq ahýaldyq ortalyq bolady. Ortalyq beınebaqylaý, kólik, turǵyn úı-kommýnaldyq sharýashylyq, densaýlyq saqtaý, bilim berý jáne ózge de 15-ten astam qalalyq jáne respýblıkalyq júıelerdi ıntegratsııalaýdy qamtamasyz etedi.
Sonymen qatar, Presight kompanııasy Astana ákimdigi úshin qýaty 100 serverlik baǵanǵa deıingi alǵashqy qalalyq derekterdi óńdeý ortalyǵyn salyp jatyr.
— Elordadaǵy beınebaqylaý ınfraqurylymy aýqymdy túrde jańǵyrtylyp jatyr. Búginde polıtsııanyń Jedel basqarý ortalyǵyna 37 myńnan astam kamera qosylǵan, olardyń kómegimen árbir úshinshi qylmys ashylyp jatyr. Jyl sońyna deıin qosymsha 20 myńnan astam jańa ıntellektýaldy beınebaqylaý kameralary ornatylady. Olar jasandy ıntellektke negizdelgen 35-ten astam beıneanalıtıka algorıtmderimen jabdyqtalady, sonyń ishinde bet-álpetti jáne minez-qulyqty taný, kólik qozǵalysyn taldaý, tótenshe jaǵdaı qyzmetterin avtomatty túrde habardar etý múmkindikteri bar. Joba aıasynda BAÁ-den 54 mlrd teńge somasynda ınsvestıtsııa tartylady. Osy jyldyń sońyna deıin joba iske qosylady, — dedi qala ákimi.
Aıta keteıik, Májilis tóraǵasy Erlan Qoshanov jasandy ıntellektini damytýǵa arnalǵan parlamenttik tyńdaýda bilim berý salasyndaǵy JI qyzmetin zańmen retteý qajettigin atap ótti.