Bestóbedegi «altyn» shahtada taǵy bir adam kóz jumdy

KÓKShETAÝ. QazAqparat – Aqmola oblysynda Bestóbe kentindegi altyn óndirý shahtasy aýmaǵynda taǵy bir adam kóz jumdy. Aldyn ala málimet boıynsha, SQO turǵyny shahtaǵa zańsyz kirý barysynda jaraqat alǵan, dep habarlaıdy QazAqparat tilshisi.

Aqmola oblystyq Polıtsııa departamenti baspasóz qyzmetiniń málimetinshe, 17 tamyzda Stepnogor qalalyq polıtsııa basqarmasyna Bestóbe kentindegi «Zapadnaıa» shahtasynyń aýmaǵynda Soltústik Qazaqstan oblysy Aıyrtaý aýdanynyń 23 jastaǵy turǵyny kóz jumǵany týraly habarlandy.

«Aldyn ala anyqtalǵandaı, er adam shahtaǵa zańsyz kirý kezinde jaraqat alyp, mert bolǵan. Osyǵan baılanysty Qylmystyq kodekstiń 269-1-baby 3-bóligi («Kúzetiletin obektige zańsyz kirý») boıynsha sotqa deıingi tergeý amaldary bastaldy. Qylmystyq isti tergeý aıasynda sot-medıtsınalyq saraptama taǵaıyndaldy», - dedi vedomstvodan.

Aıta keteıik, Aqmola oblysyndaǵy Bestóbe shahtasynda jumystar bir jyldan beri toqtap tur. Alaıda, kenishke zańsyz enip, altyn óndirisimen aınalysýshylar tyıylmaı otyr. Bul, qaıǵyly jaǵdaılarǵa ákep soǵýda. Máselen, 22 shildede Bestóbe altyn kenishinde er adamnyń denesi tabyldy. 25 shildede taǵy bir adamnyń máıiti men zardap shekken bir adam anyqtaldy.

Osyǵan oraı, «Altynalmas AK» AQ-nyń basshylyǵy shahtaǵa óz betimen túsetin adamdardyń ómirine alańdap, nysannan dereý shyǵýdy suraǵan bolatyn. Sondaı-aq Qylmystyq kodekstiń 334-baby boıynsha jer qoınaýyn óz betinshe paıdalanǵany úshin jaýapkershilik qarastyrylǵanyn, zań buzǵan adamdar 5 jylǵa deıin bas bostandyǵynan aıyrylýy múmkin ekenin eske saldy. Al Qylmystyq kodekstiń 269-1-babynda kúzetiletin aımaqqa zańsyz kirgenderge 10 jylǵa deıin bas bostandyǵynan aıyrý túrindegi jaza eskerilgen. Osy kodekstiń 295-1-babyna sáıkes baǵaly metaldar, asyl tastar, quramynda baǵaly metaldar bar shıkizat taýarlaryn zańsyz saýdalaǵandar 7 jylǵa deıin túrmege qamalýy múmkin.

Foto: polisia.kz