Bestóbe ken baıytý fabrıkasynyń dırektory óz qyzmetkerin óltirdi degen kúdikke ilindi
KÓKShETAÝ. QazAqparat - Bestóbedegi «Qazaqaltyn» JShS-ne qarasty ken baıytý fabrıkasynyń dırektory kisi óltirdi degen kúdikpen ýaqytsha ustaý ızolıatoryna qamaldy, dep habarlaıdy QazAqparat tilshisi.
Bestóbedegi ken baıytý fabrıkasynyń dırektory kásiporynnyń laborantyn úıine jetkizip tastaǵannan keıin 37 jastaǵy kelinshek aýrýhanaǵa túsip, kóz jumǵan.
Aqmola oblystyq soty baspasóz qyzmetiniń málimetinshe, tergeý sýdıasy tergeýshiniń Bestóbedegi «Qazaqaltyn» ken baıytý fabrıkasynyń 33 jastaǵy dırektoryn eki aıǵa qamaý týraly hattamasyn qanaǵattandyryp, sanktsııa berdi.
«Іs materıaldaryn qaraǵan sýdıa osyndaı sheshim qabyldaýǵa negiz bar dep esepteıdi. Er adamnyń boı tasalaýy múmkindigi jáne jumys ornynan teris minezdeme berilgeni, sondaı-aq, onyń QR QK 106-babynyń 1-bóligi boıynsha qylmystyq quqyqbuzýshylyq jasaǵany úshin kúdikke alynǵany eskerildi. Bul quqyqbuzýshylyq aýyr qylmysqa jatady. Bul bap boıynsha 3-ten 7 jylǵa deıin bas bostandyǵynan aıyrý jazasy qarastyrylady», - dep túsindirdi vedomstvonyń baspasóz qyzmeti.
Qazirgi kezde kúdikti ýaqytsha ustaý ızolıatoryna qamalǵan.
Stepnogor ortalyq qalalyq aýrhanasynyń bas dárigeri Danııar Qınaıatov qaıtys bolǵan adamnyń alǵan jaraqaty týraly qandaı bir aqparat berýden bas tartty. Sonymen qatar, ol kólikten sekirý kezinde jaraqat alý múmkindigi de tergeý organdary men sot-medıtsınalyq saraptamanyń quzyrynda ekenin aıtty.
Aqmola oblystyq polıtsııa departamentiniń baspasóz qyzmeti qyzdyń óliminen keıin QR QK 106-babynyń 3-bóligine (abaısyzda adam ólimine ákelgen, densaýlyǵyna qasaqana aýyr zardap keltirý) aýystyryldy. Atalmysh sanktsııa boıynsha kúdiktiniń qylmysy dáleldense, onda ol aldaǵy 8-12 jylǵa deıingi ómirin temir tordyń ar jaǵynda ótkizýi múmkin.
