Bestóbe altyn kenishinen aýyl turǵynynyń denesi tabyldy

KÓKShETAÝ. QazAqparat – Aqmola oblysynyń Bestóbe altyn kenishinde er adamnyń denesi tabyldy, dep habarlaıdy QazAqparat tilshisi.

«Altynalmas» AK» aktsıonerlik qoǵamynyń málimetinshe, atalmysh shahtanyń jumys istemeı turǵanyna bir jyldaı ýaqyt bolǵan.

Іshi jer asty sýyna tolǵan, sondaı-aq, jeldetý jáne basqa ınjenerlik júıeleri isten shyqqan. Sondyqtan shahtaǵa kirý adam ómiri úshin qaýipti.

Er adamnyń denesi uıyqtaýǵa arnalǵan kórpe qaptan tabylǵan. Onyń sol Bestóbe aýylynyń turǵyny ekeni belgili bolyp otyr.

Osy rette Aqmola oblystyq polıtsııa departamentiniń baspasóz qyzmeti shahtadan er adam denesiniń tabylý deregin rastady.

Sonymen birge, bul derektiń sotqa deıingi tergeýdiń biryńǵaı tizilimine engizilgenin jáne osyǵan qatysty tergeý júrip jatqanyn atap ótti.

Aıta ketsek, budan buryn Aqmolada sýǵa batqan 27 jastaǵy boıjetkenniń denesi úsh kúnnen beri tabylmaı jatqanyn jazǵan bolatynbyz.