Besterektegi jol apaty: zardap shekken qyzdy Semeıge jetkizdi

ASTANA. KAZINFORM –  Abaı oblysy Úrjar aýdanynyń Besterek aýylynda bolǵan jol-kólik oqıǵasynan zardap shekken úsh balanyń bireýi medıtsınalyq avıatsııa arqyly aýdandyq aýrýhanadan Semeı medıtsına ýnıversıteti gospıtaliniń balalar bólimshesine jetkizildi. Bul týraly Abaı oblysynyń densaýlyq saqtaý basqarmasy habarlady. 

Jaraqatynyń aýyrlyǵyna jáne tasymaldaý kezinde ómirine qaýip tóndirý yqtımaldyǵyna baılanysty birden oblys ortalyǵyna jetkizý múmkin bolmady. Únemi baqylaý men tekserýlerden keıin jaǵdaıy áýe kóligimen tasymaldaýǵa jaramdy dep tanylyp, Semeıge jetkizý týraly sheshim qabyldandy.

— Semeı medıtsına ýnıversıteti gospıtaliniń dárigerleri, atap aıtqanda, gospıtal dırektorynyń pedıatrııa jónindegi orynbasary, Abaı oblysynyń shtattan tys bas anestezıology Dýlat Karımov jáne balalar travmatologııasy bóliminiń meńgerýshisi, oblystyń shtattan tys bas neırohırýrgi Jasulan Asetov alǵashqy kúnnen bastap Úrjar aýdandyq aýrýhanasynda kómek kórsetip, balany oblys ortalyǵyna jetkizdi.

Ýnıversıtet gospıtalinde zamanaýı qurylǵylardyń kómegimen naýqastyń jaǵdaıy jan-jaqty tekserilip, tıisti emdeý sharalary júrgizilip jatyr, — delingen habarlamada.

Abaı oblysynyń Densaýlyq saqtaý basqarmasy men Semeı medıtsına ýnıversıteti basshylyǵy tarapynan zardap shekken balaǵa barlyq qajetti kómek kórsetilip jatyr. Qazirgi ýaqytta zardap shekken bala Anestezııa, reanımatsııa jáne qarqyndy terapııa bólimshesinde em qabyldap jatyr.

Balanyń jaǵdaıy oblys ákimi Berik Ýálıulynyń jiti baqylaýynda.

Aıta ketelik Abaı oblysyndaǵy jol apatynan keıin Prezıdent tapsyrmasymen áskerı ushaq attanǵan edi.  Belgili bolǵandaı, zardap shekkender eki otbasynyń balalary. Keshe Abaı oblysynyń Úrjar aýdanynan jol-kólik oqıǵasynan zardap shekken eki balany Ulttyq shuǵyl medıtsınany úılestirý ortalyǵynyń sanıtarııalyq avıatsııa borty Astana qalasyna alyp kelgen edi.