Besterektegi jol apaty: Zardap shekken eki bala aýrýhanadan shyǵaryldy
ASTANA. KAZINFORM — Abaı oblysynyń Úrjar aýdanynda jol-kólik oqıǵasynan zardap shekken eki balanyń ómirine eshqandaı qaýip joq, dep habarlaıdy Astana qalasynyń № 2 Kópbeıindi qalalyq balalar aýrýhanasynyń baspasóz qyzmeti.
Aýrýhana dırektory Gúlnar Kýlýshevanyń sózinshe, jol apatynan zardap shekken eki bala aýyr halde sanıtarlyq avıatsııa arqyly elordalyq aýrýhanaǵa jetkizildi.
— Astana qalasynyń № 2 Kópbeıindi qalalyq balalar aýrýhanasynyń dárigerler toby kúrdeli operatsııalar jasap, tolyqqandy em júrgizdi. Dárigerlerdiń kásibıliginiń arqasynda balalardyń ómirin aman alyp qalý múmkin boldy, — dedi ol.
Gúlnar Kýlýsheva atap ótkendeı, búgin balalar úılerine shyǵaryldy.
— Ata-analary balalarynyń qaıtadan kúlimdep júrgenin kórgende, dárigerlerge shyn júrekten alǵystaryn bildirdi. Eń bastysy — olardyń ómirine eshqandaı qaýip joq. Aldaǵy ýaqytta ońaltýlary jeńil ótip, tek densaýlyq pen baqytty balalyq shaq tileımiz, — dep jyly lebizin bildirdi aýrýhana basshysy.
Eske salsaq, 19 tamyzda Abaı oblysy Úrjar aýdanynda 55 jastaǵy Toyota kóliginiń júrgizýshisi rólge ıe bola almaı, úı qaqpasynyń janynda, joldan 10 metr qashyqtyqta turǵan kámeletke tolmaǵan balalardy qaǵyp ketken.
Polıtsııanyń habarlaýynsha, jol apaty saldarynan eki bala oqıǵa ornynda kóz jumǵan, taǵy bireýi aýrýhanaǵa barar jolda qaıtys bolǵan. Úsh jasóspirim túrli jaraqattarmen medıtsınalyq mekemege jetkizildi.
Abaı oblysynda bolǵan jol-kólik oqıǵasyna baılanysty Memleket basshysynyń tapsyrmasy boıynsha zardap shekkenderge shuǵyl medıtsınalyq kómek kórsetý úshin áskerı ushaq jiberildi.
Keıinnen zardap shekken eki balany Astanaǵa alyp keletini belgili boldy. Oǵan Ulttyq shuǵyl medıtsınany úılestirý ortalyǵynyń sanıtarııalyq avıatsııa borty tartyldy.
Buǵan deıin jol apatynan zardap shekken balalardyń qazirgi jaǵdaıy týraly habarlaǵan edik.
Al úsh balany qaǵyp óltirgen júrgizýshi eki aıǵa qamaýǵa alyndy.
Qazir epılepsııamen esepte turǵan kúdiktige qalaısha júrgizý kýáligi berilgeni tekserilip jatyr.