Besterektegi jol apaty: oqıǵa ornynda arnaıy top jumys istep jatyr

SEMEI. KAZINFORM – Abaı oblysynda kámeletke tolmaǵan balalardyń qaza bolýyna ákelgen jol apatyna baılanysty qara jamylǵan otbasylarǵa jerleý rásimin uıymdastyrýda barlyq qajetti kómek kórsetiledi. Sonymen qatar psıhologııalyq jáne materıaldyq qoldaý usynylady, dep habarlaıdy oblys ákiminiń baspasóz qyzmeti.

Aıta keteıik, kólik qaqqan alty balanyń úsheýi kóz jumyp, taǵy úsheýi dárigerlerdiń baqylaýynda jatyr. Memleket basshysynyń tapsyrmasymen kómek kórsetý úshin Astanadan QR Qorǵanys mınıstrligi áskerı-kólik avıatsııasynyń ushaǵymen Densaýlyq saqtaý mınıstrliginiń dárigerleri jetkizildi.

Abaı oblysynyń ákimi Berik Ýálıdiń tapsyrmasyna sáıkes, marqumdardyń otbasylaryna jerleý rásimine qatysty barlyq qoldaý sharalary usynylady.

Ákimdik baspasóz qyzmeti habarlaǵandaı, oqıǵa ornynda oblys ákimi orynbasarynyń úılestirýimen arnaıy jumys toby jumys istep jatyr.

– Jaǵdaı erekshe baqylaýda, – delingen habarlamada.