Besterektegi jol apaty: 3 balany qaǵyp óltirgen júrgizýshi eki aıǵa qamaýǵa alyndy

ASTANA. KAZINFORM — Abaı oblysynyń Úrjar aýdanynda bolǵan úsh balanyń qaza bolýyna ákep soqqan jol-kólik oqıǵasy boıynsha oblystyq polıtsııa departamenti qylmystyq isti tergep jatyr, dep habarlaıdy ІІM baspasóz qyzmeti.

Kúdikti júrgizýshi dereý ustalyp, ýaqytsha ustaý ızolıatoryna qamaldy.

— Sot sanktsııasymen oǵan eki aıǵa qamaýda ustaý túrindegi bultartpaý sharasy qoldanyldy. Qylmystyq istiń tergelýi Іshki ister mınıstrliginiń baqylaýynda, — delingen habarlamada.

Eske salsaq, keshe Abaı oblysy Úrjar aýdanynda 55 jastaǵy Toyota kóliginiń júrgizýshisi rólge ıe bola almaı, úı qaqpasynyń janynda, joldan 10 metr qashyqtyqta turǵan kámeletke tolmaǵan balalardy qaǵyp ketken.

Polıtsııanyń habarlaýynsha, jol apaty saldarynan eki bala oqıǵa ornynda kóz jumǵan, taǵy bireýi aýrýhanaǵa barar jolda qaıtys bolǵan. Úsh jasóspirim túrli jaraqattarmen medıtsınalyq mekemege jetkizildi.

Abaı oblysynda bolǵan jol-kólik oqıǵasyna baılanysty Memleket basshysynyń tapsyrmasy boıynsha zardap shekkenderge shuǵyl medıtsınalyq kómek kórsetý úshin áskerı ushaq jiberildi.

Buǵan deıin jol apatynan zardap shekken balalardyń qazirgi jaǵdaıy týraly habarlaǵan edik.

Keıinnen zardap shekken eki balany Astanaǵa alyp keletini belgili boldy. Oǵan Ulttyq shuǵyl medıtsınany úılestirý ortalyǵynyń sanıtarııalyq avıatsııa borty tartyldy.