«Besoba» TK-de úıdiń opyrylyp qulaý faktisi boıynsha sheneýnikterdiń ústinen qylmystyq is qozǵalady
QARAǴANDY. 15 mamyr. QazAqparat - Qaraǵandyda «Besoba» turǵyn úı keshenindegi opyrylyp qulaǵan úıdi salý barysynda memlekettik sáýlet-qurylys baqylaýdy júzege asyrǵan laýazymdy tulǵalarǵa qatysty qymystyq is qozǵaý máselesi sheshilýde.
Bul týraly búgin brıfıngte Qaraǵandy oblysy prokýratýrasy arnaıy prokýrorlar basqarmasynyń bastyǵy Muhamedkárim Bektursynov málim etti.
«Aıta keteıin, kináliler dep tanylǵandardyń sany arta túsýde. Osyǵan baılanysty birinshi qylmystyq istiń aıasynda taǵy eki isti qozǵaý týraly sheshim qabyldandy. Bir is - úıdiń qurylysyn júrgizýshilerge, ekinshisi jobalaýshylarǵa qatysty. Qazirgi ýaqytta memlekettik sáýlet-qurylys baqylaýyn júzege asyrǵan laýazymdy tulǵalarǵa qatysty qylmystyq is qozǵaý máselesi sheshilýde», - dedi M. Bektursynov.
Bir aıdan astam ýaqytta tekserý toby keń aýqymdy jumys atqardy, dep atap ótti arnaıy prokýror.
Tergeý 64 páter ıesin zardap shekti dep tanydy. Qazirgi ýaqytta birinshi qylmystyq is boıynsha 4 adam kúdikti retinde qarastyrylýda, qurylystyń barlyq jobalaý kezeńine, memlekettik qabyldaýǵa qatysy bar barlyq qylmystyq ister boıynsha 20-25 adam jaýapqa tartylýda.
