Besinshi sessııa boıynsha Májilistiń alǵashqy bıýro otyrysy ótti
ASTANA. QazAqparat - Búgin Májilis Spıkeri Qabıbolla Jaqypovtyń tóraǵalyǵymen besinshi sessııa boıynsha Májilistiń alǵashqy bıýro otyrysy ótti, dep habarlady Májilis apparatynyń baspasóz qyzmetinen.
Májilis Tóraǵasy depýtattardyń jazǵy kanıkýly kezinde Premer-Mınıstr bastaǵan Jańǵyrtý jónindegi Ulttyq Komıssııa Prezıdent Ákimshiligimen, Úkimetpen, Parlament Palatalarynyń Apparattarymen etene jumys atqarǵanyn aıta kelip:
-Elbasymyzdyń Ult Josparyn zańnamalyq turǵydan qamtamasyz etýge baılanysty barlyǵy 67 zań qabyldaý usynylyp otyr. Biz ony abyroımen oryndaýymyz qajet. Qazirdiń ózinde 37 jańa zań jobasy Májilis qaraýyna engizildi,-dedi. Al burynnan Májilis qorjynynda jatqan 7 zań jobasyn qosqanda, aldaǵy jalpy otyrysta depýtattar talqysyna 44 zań jobasy usynylmaq. Osyǵan baılanysty Halyqaralyq ister, Qorǵanys jáne Qaýipsizdik komıtetine 10, Zańnama jáne sot-quqyqtyq reforma komıtetine 8, Qarjy jáne bıýdjet komıtetine 7, Ekonomıkalyq reforma jáne óńirlik damý komıtetine 4, Áleýmettik jáne mádenı damý komıtetine 8, Agrarlyq máseleler komıtetine 2, Ekologııa máseleleri jáne tabıǵat paıdalaný komıtetine 5 zań jobasy boıynsha qorytyndy ázirleý merzimin taǵaıyndaý kózdelip otyr. Olardyń qatarynda memlekettik qyzmet, Joǵary Sot Keńesi, Qoǵamdyq keńester, Sybaılas jemqorlyqqa qarsy is-qımyl, «Astana» halyqaralyq qarjy ortalyǵy týraly, Eńbek kodeksiniń jobasy jóninde, mindetti áleýmettik medıtsınalyq saqtandyrý, Jer kodeksine ózgerister men tolyqtyrýlar engizý, Organıkalyq ónim óndirý, aqparatqa qol jetkizýge qatysty, sondaı-aq, Qazaqstan-Qytaı memlekettik shekarasynyń rejımi týraly kelisimdi, Shanhaı yntymaqtastyq uıymyna múshe memleketterdiń úkimetteri arasyndaǵy halyqaralyq avtomobıl tasymaldary úshin qolaıly jaǵdaılar jasaý týraly kelisimdi ratıfıkatsııalaý týraly zań jobalary bar.
