Besinshi saılanǵan Parlamenttiń tórtinshi sessııasy 113 zań qabyldady - Májilis spıkeri
ASTANA. QazAqparat - Besinshi saılanǵan Parlamenttiń tórtinshi sessııasy barysynda depýtattyq korpýstyń qaraýynda 190 zań jobasy bolyp, sonyń 113-i qabyldandy.
Búgin Parlament palatalarynyń birlesken otyrysynda sessııa jumysyn qorytyndylaǵan Májilis Tóraǵasy Qabıbolla Jaqypov osylaı málimdedi.
Spıkerdiń aıtýynsha, zań shyǵarýshy bıliktiń aǵymdaǵy sessııa barysyndaǵy qyzmeti janjaqty, qaýyrt jumysqa toly ári tabysty boldy. «Sessııa barysynda Parlament palatalarynyń úsh birlesken otyrysy, Májilistiń 41 jalpy otyrysy ótip, onda 335 másele qaraldy. Senattyń 33 otyrysynda 161 másele qaraldy. Esepti kezeń ishinde qos palatanyń qaraýynda 190 zań jobasy kelip túsken bolsa, sonyń 113-i qabyldandy. Osy sessııa barysynda ekinshi sessııaǵa qaraǵanda 17 zań, al úshinshi sessııaǵa qaraǵanda 9 zań artyq qabyldanyp otyr», - dedi Májilis Tóraǵasy.
Onyń sózine araǵanda, qabyldanǵan zańdardyń 4-eýi konstıtýtsııalyq, 9-y derbes, 35-i zańnamalyq aktilerge ózgerister men tolyqtyrýlar engizý týraly, 65-i halyqaralyq kelisimsharttardy ratıfıkatsııalaý týraly bolyp otyr.
Sonymen qatar, zań jobalarymen jumys barysynda Májiliste bir myńnan astam jumys toptarynyń, eki júzden astam komıtetterdiń keńeıtilgen otyrysy ótip, depýtattar zań jobalary boıynsha 10 myńǵa jýyq usynystar jasaǵan.
