Besinshi saılanǵan QR Parlamentiniń besinshi sessııasy óz jumysyn bastady (FOTO)
ASTANA. QazAqparat - Búgin QR Parlamenti Palatalarynyń birlesken otyrysy ótip, besinshi saılanǵan QR Parlamentiniń besinshi sessııasy óz jumysyn bastady.
«Búgingi bizdiń birlesken otyrysymyzǵa respýblıkamyzdyń Premer-Mınıstri, Memlekettik hatshysy, Prezıdent Ákimshiliginiń basshysy, Konstıtýtsııalyq Keńestiń, Joǵarǵy sottyń jáne Ortalyq saılaý komıssııasynyń tóraǵalary, Úkimet músheleri, Qazaqstan Prezıdentine tikeleı baǵynatyn jáne esep beretin memlekettik organdardyń basshylary, Prezıdent Ákimshiliginiń, Premer-Mınıstrdiń keńsesiniń, Parlament palatary apparattarynyń jaýapty qyzmetkerleri jáne BAQ ókilderi qatysyp otyr. Búgingi bizdiń otyrysymyzdyń kún tártibinde bir ǵana másele bar. Ol «besinshi saılanǵan QR Parlamentiniń besinshi sessııasynyń ashylýy týraly», - dedi Májilis Tóraǵasy Qabıbolla Jaqypov.
Sessııanyń ashylýyna Senattyń 47 depýtatynan 44-i , Májilisten 107 depýtattyń 104-i qatysty.
«Ózderińiz bilesizder, Elbasymyz Nursultan Ábishuly Nazarbaev memlekettik saparmen Qytaı Halyq Respýblıkasynda júr. Osyǵan baılanysty «QR Parlamenti jáne onyń depýtattarynyń mártebesi týraly» konstıtýtsııalyq zańynyń altynshy babynyń besinshi tarmaǵyna sáıkes, maǵan Parlament Májilisiniń Tóraǵasy retinde Qazaqstan Respýblıkasy Prezıdentiniń bergen tapsyrmasy boıynsha besinshi saılanǵan QR Parlamentiniń besinshi sessııasyn ashyq dep jarııalaýǵa ruqsat etińizder», - dedi Q. Jaqypov.
