Besbarmaq, baýyrsaq, kespe: Endi ulandarǵa ulttyq taǵam beriledi

ASTANA. KAZINFORM — Budan bylaı ulttyq ulan sarbazdaryna ulttyq taǵamdar beriledi.

Ulttyq ulan baspasóz qyzmeti taratqan aqparatqa súıensek, qazaq halqynyń ulttyq taǵamdaryn tanymal etý men mádenı qundylyqtardy saqtaý maqsatynda áskerı qyzmetshilerdiń ratsıonyna ózgerister engizildi. 

Jańartylǵan áskerı ratsıonǵa qazaqsha et, sirne, naýryz-kóje, naryn, kespe, baýyrsaq jáne basqa da dástúrli taǵamdar kiredi.

— Áskerı tamaqtanýǵa ulttyq taǵamdardy engizý — bul aspazdyq jańalyq qana emes, áskerı qyzmetshilerimizdiń jaýyngerlik rýhyn nyǵaıtý men mádenı biregeıligin saqtaýdaǵy mańyzdy qadam, — deıdi Ulttyq ulan Bas qolbasshysynyń tyl jónindegi orynbasary Erkebulan Hamıdýllın.

Usynylyp otyrǵan ózgerister aldyn ala qazaq tamaqtaný akademııasymen kelisilgen. Sebebi kalorııasy men energetıkalyq qundylyǵy joǵary ulttyq taǵamdarmen baıytylǵan ratsıon zat almasýdy, ımmýnıtetti jaqsartýǵa jáne qarqyndy júktemeden keıin kúsh-qýatty qalpyna keltirýge yqpal etedi.

— Bul bastama áskerı qyzmetshilerdiń densaýlyǵyn nyǵaıtyp qana qoımaı, olardy patrıottyq rýhta tárbıeleýde mańyzy ról atqarady, — deıdi Ulttyq ulannan.

Aıta ketsek, Ulttyq ulan qoımasyndaǵy azyq-túlik qorynyń jaramdylyq merzimine tsıfrlyq baqylaý engizildi. 

Taıaýda Kazinform tilshisi Ulttyq ulan sarbazynyń bir kúnimen tanysyp, áskerı qyzmet sátinen fotoreportaj jasaǵan edi.