Besaǵash turǵyndary laı ortasynda qalamyz ba dep qaýiptenip otyr
ALMATY. QazAqparat - Almaty irgesindegi Besaǵash aýylynyń júzdegen otbasy ákimdiktiń tabaldyryǵyn tozdyryp júrgeli biraz boldy. Turǵyndar qatty náser jaýyn jaýsa, úıleri laı ortasynda qalmaı ma dep qorqyp otyr. Bul týraly «Býrabaı» kottedj qalashyǵynyń turǵyndary QazAqparat tilshisine aıtty.
Olardyń aıtýynsha, bar pále kottedj qalashyǵynyń ıesi Dáýren Meıirmanov degen azamattyń óz isine jaýapsyzdyǵynan týyndaǵan. Ol turǵyndardyń qaýipsizdigi úshin eshqandaı áreket jasap jatqan joq.
«Úsh jyl buryn qalashyqtyń joǵarǵy jaǵyndaǵy jerge úıler salynǵan. Endi tómengi jaǵynan salynyp jatyr. Úı salý úshin taý bókteri uńǵylyp, tegistelip sol arqyly jer aýmaǵyn ulǵaıtýda. Onyń asty túgel sary topyraq. Ótken joly 1 úıdi laı basyp qaldy. Endi barlyq 100 otbasy laı ortasynda qalýy múmkin», - dedi turǵyndardyń biri Aıjan Tilekbaeva.
Jergilikti qalashyqty sý, káriz júıesimen, elektr jelisimen jabdyqtaýda problema shash etekten. Jolǵa asfalt tóseýdi de jergilikti monopolıst keıinge qaldyrǵan.
«Jerdi satyp alǵan kezde Meıirmanovtyń adamdary bizden aqsha jınap alǵan. Alaıda, ol aqsha qajetti maqsatta jumsalmady. Qaryzǵa belsheden battyq. Elektr energııasyna qaryzymyz kóbeıip, is sotqa ketti. Sot Meıirmanovty boryshty qaıtarýǵa úkim shyǵardy. Biraq áli sol qaryz moınymyzda tur», - dep aıtty PÁK tóraıymy Janna Jákenova.
Amaly qalmaǵan turǵyndar aýyl ákimi Muhıt Álibekovke júgingen.
«Biz jaǵdaıdy túsinip otyrmyz, biraq qazir ákimdikte aqsha joq. Biraq jergilikti bılik Meıirmanovqa yqpal etse de jaman emes. Káriz jelisi durys júrgizilmegendikten adamdar árqaıysy septık qazyp alǵan. Al myna sary topyraq ústinde ornalasqan jerde bul álbette qaýipti», - dedi A. Tilekbaeva.
Óz kezeginde aýyl ákimi turǵyndardyń aryz shaǵymyn jiti baqylaýǵa alatynyn aıtty.
«Talǵar aýdany ákimdiginde jıyn ótti. Meıirmanov barlyq problemany sheship beremin dedi. Bul týraly hattama bar. Bári kýá boldy. Máseleni baqylaýǵa alamyz», - dedi Muhıt Álibekov.
Aıta keteıik, Besaǵash aýylynda taýdaǵy sary topyraq kóship, laı bir úıdiń aýlasyn túgel basyp qalǵan bolatyn. Mamandardyń aıtýynsha, tolassyz jaýǵan jańbyrdan topyraq asty qopsyp ketedi.
