Bes jylda travmatıkalyq qarý qoldaný arqyly 257 qaraqshylyq shabýyl jasalǵan
ASTANA. 29 mamyr. QazAqparat - Sońǵy bes jylda travmatıkalyq qarý qoldanýdan 22 adam mert bolǵan 257 qaraqshylyq shabýyl jasaldy,
642 buzaqylyq oryn alyp, 48 jaǵdaıda qarýdan aýyr jáne ortasha dene jaraqaty salyndy. Búgin Parlament Májilisinde «Travmatıkalyq qarý:zańnamalyq retteý máseleleri» atty dóńgelek ústel barysynda Іshki ister mınıtri Qalmuhanbet Qasymov osylaı málim etti.
Mınıstrdiń sózine qaraǵanda, kóp jaǵdaıda travmatıkalyq qarý buzaqylar arasyndaǵy «esep aıyrysýlarda» jáne jastar arasyndaǵy buzaqylyqtarda qoldanylyp júr. Ondaı oqıǵalardyń sońy qaıǵyly aıaqtalyp jatady. «Máselen, jaqynda ǵana Almaty oblysynyń Úshtóbe qalasyndaǵy saıabaqta 9-synyp oqýshysy travmatıkalyq qarýdan óziniń synyptasyn keýde tusynan atyp, ol aýyr jaraqattan ajal qushty. Osyndaı mysaldar jetkilikti», - deıdi Q. Qasymov. Onyń aıtýynsha, travmatıkalyq qarýlardyń basym bóliginde oq syrty rezeńkemen qaptalǵan temirden jasalady. Sondyqtan da qarýdyń osy túrin qoldaný arqyly jasalǵan qylmystardyń basym bóligi ashylmaı qalýda. «Máselen, Oral qalasynda kóshede ketip bara jatqan azamat Jaılaýov travmatıkalyq qarýdan atylǵan oqpen arqasynan jaraqat aldy jáne aýrýhanada sonyń saldarynan kóz jumdy. Bul qylmys áli kúnge deıin ashylǵan joq. Sonymen qatar, aǵymdaǵy jyldyń ózinde quqyq qorǵaý qyzmetkerine qarsy travmatıkalyq qarý qoldanýdyń eki faktisi tirkeldi. Onyń birinde ýchaskelik polıtsııa qyzmetkeri jaraqattansa, ekinshisinde Shymkent qalasynda júrgizýshini toqtatqan jol polıtsııasyna travmatıkalyq qarý qoldanylǵan», - deıdi Q. Qasymov.
