Bes jylda bilim týraly zańnama 29 ret ózgergen – depýtat

NUR-SULTAN. QazAqparat – Táýelsizdik jyldary elimizdegi eń kóp reformalanǵan sala – bilim berý boldy. Bul pikirdi Senat depýtaty Murat Baqtııaruly aıtty, dep habarlaıdy QazAqparat tilshisi.

«Osy kezge deıin bilim salasynda biz eliktemegen el qalǵan joq shyǵar. Biraq olar qoǵamǵa qajet pe, múddemizge saı ma, oǵan bas aýyrtpadyq. Nátıjesinde táýelsizdik jyldarynda elimizdegi neǵurlym reformalanǵan sala – bilim berý salasy boldy. Tek sońǵy 5 jylda bilim týraly zańǵa 29 ret ózgerister men tolyqtyrýlar engizildi, memlekettik bilim berý standarty 2000-2017 jyldary 7 ret ózgerdi. Ár ózgeris saıyn oqýlyqtyń mazmuny jańaryp, qyrýar qarjy bólinip, jańa oqýlyqtar basylyp jatady. Damyǵan elderde, mysaly Japonııada memlekettik bilim berý standarty birneshe jyl talqylanyp, sońǵy ret 2010 jyly bekitildi, sodan keıin ózgeriske túsken joq», - dedi depýtat Senat otyrysynda.

M. Baqtııaruly orta mektepte de jańartylǵan bilim berý baǵdarlamasyn jasaýda tym asyǵystyqqa jol berilgenin aıtty.

«Aınaldyrǵan tórt jylda 3,5 mln oqýshyǵa bilim berý refomrasyn jasap tastap, olardyń sheksiz reformalardyń tájirıbelik alańyna aınaldyrdyq. Biraq reformalardyń nátıjesi men olardyń qandaı bilim alǵanyna eshkim jaýap bergen emes. Sońǵy 30 jylda Qazaqstannyń bilim berý júıesinen 10 mln adam ótipti. Osy tusta biz tulǵa qalyptastyrýshy orta mektepterge erekshe nazar aýdarýymyz kerek edi. Óıtkeni jańa urpaqtyń ózine degen seniminiń tómendigine, maman, tulǵa retinde tıisti dárejede qalyptasa almaýynyń saldary men qaıshylyqtaryna biz de jaýaptymyz. Bir-birinen alshaq áleýmettik toptardyń bolýy, olardyń bir-birine ashyq qarsy shyǵýy, qatygezdik pen ozbyrlyqqa barýynyń túp tamyry bilimde jatyr. Sebebi, shyn mánindegi sapaly bilimge qoly jetetin orta bizde jetkiliksiz», - dedi Senat depýtaty.