Bes jylda 3 myń shaqyrymnan asatyn toptyq sý qubyry salynady - mınıstr

NUR-SULTAN. QazAqparat - 5 jyldyń ishinde 3 myń shaqyrymnan astam toptyq sý qubyrlary salynady. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Jospar boıynsha 2025 jylǵa deıin 11 toptyq sý qubyry qaıta jańartylyp, jóndeledi. Onyń ishinde birqatar sý qubyrlary uzartylady. Sonyń arqasynda 87 aýyldyq eldi meken taza aýyz sýmen qamtamasyz etiledi. Bul 104 myńǵa jýyq adamdy qamtıdy», - dedi ol Senat Tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.

Sonymen qatar, mınıstr 321 aýyldyń aýyz sý berý júıesi jańartylatynyn aıtady.

«Bul óz kezeginde 525 myń adamdy qamtıdy. 5 jyldyń ishinde 3 myń shaqyrymnan astam toptyq sý qubyry salynady. Aýyz sýmen qamtamasyz etý kórsetkishin 100 paıyzǵa deıin jetkizý josparlanyp otyr», - dedi Maǵzum Myrzaǵalıev.