Bes jyl ishinde travmatıkalyq qarý qoldaný arqyly myńǵa tarta qylmys jasalǵan - Májilis spıkeri
ASTANA. 29 mamyr. QazAqparat - Bes jyl ishinde travmatıkalyq qarý qoldaný arqyly myńǵa tarta qylmys jasalǵan.
Búgin Májiliste «Travmatıkalyq qarý:zańnamalyq retteý máseleleri» atty taqyrypta ótken dóńgelek ústel barysynda palata spıkeri Nurlan Nyǵmatýlın osylaı málim etti.
«Memleket basshysy udaıy qoǵamdyq qaýipsizdikti qamtamasyz etý, halqymyzdyń ómirin saqtaý, zańsyz áreketterge jol bermeý birinshi kezektegi eń mańyzdy mindet bolyp tabylatynyn aıtyp keledi. Osyǵan oraı travmatıkalyq qarý qoldanýǵa qatysty másele qoǵamda ózekti bolyp otyr. Óıtkeni, azamattyń ózin qorǵaýǵa arnalǵan qarýy sońǵy kezde kóptegen qylmystyq jaǵdaıdyń oryn alýyna jol ashýda. Máselen ótken bes jyl ishinde travmatıkalyq qarý qoldaný arqyly myńǵa tarta qylmys jasalǵany belgili bolyp otyr», - dedi spıker. Onyń aıtýynsha, sońǵy bes jylda quqyq qorǵaý organynyń qyzmetkerleri ózin ózi qorǵaýǵa qatysty travmatıkalyq qarýdy qoldanýdyń 19 faktisin tirkegen. «Sondyqtan da ózin qorǵaýǵa arnalǵan qarý halqymyz úshin qater kózine aınalyp otyr. Endeshe azamattardy qorǵaýdyń bir ǵana joly bar, bul travmatıkalyq qarýdy qoldanýǵa múldem tyıym salý ne bolmasa ony qoldaný talaptaryn barynsha qataıtý. Basqa jol joq», dedi N. Nyǵmatýlın.
