Bes jyl buryn Taılandta sý basqan úńgirden qutqarylǵan bala qaıtys boldy
SINGAPÝR. QazAqparat - 2018 jyly Taılandta sý basqan úńgirden qutqarylǵan 12 balanyń biri Dýangpetch Promtep (Duangpetch Promthep) Ulybrıtanııada qaıtys boldy, dep habarlaıdy QazAqparat VVS-ge silteme jasap.
Jasóspirim óliminiń sebebi belgisiz, onyń basynan jaraqat alǵany habarlandy.
Ótken jyldyń sońynda 17 jasar Dýangpetch Promtep Lestershır grafstvosyndaǵy Brýk Haýs kolledjiniń (Brooke House College) fýtbol akademııasyna tústi.
Promtep Taılandtyń «Wild Boars» («Jabaıy qabandar») jasóspirimder fýtbol komandasynyń kapıtany boldy. Bul komanda 2018 jyly jattyqtyrýshysymen birge Chıangraı provıntsııasyndaǵy sý basqan úńgirde eki apta qamalyp qalǵan edi.
Jasóspirimniń anasy onyń qaıtys bolǵanyn Chıangraıdaǵy Vat Doı Vao (Wat Doi Wao temple) ǵıbadathanasynyń ókilderine habarlady. Bul qaıǵyly jańalyqty komandadaǵy keı joldastary áleýmettik jelidegi akkaýnttarynda bólisti.
Ǵıbadathana ókilderi jasóspirimniń otbasyna kóńil aıtty.
Promtepke Anglııada oqýǵa stıpendııa alýǵa kómektesken Taılandtyń Zico Foundation kommertsııalyq emes uıymy da Facebook-tegi resmı paraqshasynda kóńil aıtty.
Promtep - 2018 jyly 23 maýsymda jattyqtyrýshymen birge Tham Lýang úńgirine barǵan «Jabaıy qabandar» fýtbol komandasynyń múshesi. Kenetten nóser jaýyn jaýyp, úńgirdi sý basty.
Sol kezde ol 13 jasta, al onyń komandalyq joldastary 11-16 jas aralyǵynda boldy.
Uldar men jattyqtyrýshysy sý basqan úńgirde eki apta ótkizdi. Olardy izdeý-qutqarý operatsııasyna 100-ge jýyq taılandtyq jáne sheteldik súńgýir qatysty.
Tham Lýang - Taılandtyń úlkendigi jaǵynan tórtinshi úńgirler júıesi. Bul komandanyń súıikti oryndarynyń biri edi.
Fýtbol komandasynyń qutqarylýyn búkil álem qadaǵalap otyrdy. Ótken jyly Netflix osy tańǵajaıyp qutqarý oqıǵasy týraly shaǵyn serıal túsirdi.
Foto: Getty Images
