Bes jyl boıy júldesiz qalmaǵan «Astana arlandarynyń» aldaǵy aıqastary qalaı bolmaq?
ASTANA. QazAqparat - Búgingi tańda zaman talabyna saı boks erejelerine de, judyryqtasý tásilderine de ózgerister enip jatyr. Túrli jobalar iske asyrylyp, boksshylardy ár qyrynan tanyp jatyrmyz. Sol jobalardyń biri osydan bes jyl buryn bastaý alǵan AIBA-nyń uıymdastyrýymen ótip kele jatqan Búkilálemdik boks serııasy (WSB) jobasy.
Bul jobaǵa Qazaqstan alǵashqy jyldan bastap, «Astana arlandary» degen ataýmen jańa qurama jasaqtap, jyl saıyn qatysyp keledi. Jaı qatysyp qana júrgen joq. Qazaq boksshylarynyń sheberligin búkil álemge pash etip, bes jyl boıy tek úzdikter qatarynan kórinip keledi.
Aıtalyq, «Astana arlandary» bes jyldyń ishinde úsh ret fınalda óner kórsetti. Eki dúrkin WSB jobasynyń chempıony atandy. Mundaı ataqqa bes jyldyń ishinde bizdiń «arlandardan» basqa birde-bir komanda qol jetkize alǵan joq. Osydan-aq, qazaq boksynyń áleýeti qanshalyq myqty ekenin ańǵarý qıyn emes.
Endi «Arlandarymyzdyń» osy bes jyldaǵy qol jetkizgen jetistikterine qysqasha toqtalyp óteıik. Alǵashqy jyly bizdiń jigitter qarsylastarynyń barlyǵyn qoǵadaı japyryp kelip, tek fınalda jeńiske synyq súıem jetpeı súrindi. Osylaısha birinshi jyly kúmis júldeni qanaǵat tutty. Al ekinshi maýsymda da toptyq kezeńderde qarsylas shaq keltirmeı, tek jartylaı fınaldyq saıysqa jetkende qarsylastaryna ese jiberip aldy. Úshinshi maýsymda, ıaǵnı 2013 jyly jerlesterimizdiń kópten kútken armany oryndalyp, Búkilálemdik boks serııasynyń bas júldesin qanjyǵasyna baılady. Tórtinshi maýsymda jeńis tuǵyrynyń eń bıik satysynan kórinbese de úzdik úshtikke iline aldy. Al ótken jylǵy besinshi maýsymda 2013 jylǵy jetistigin qaıtalap, Búkilálemdik boks serııasynyń tarıhyndaǵy tuńǵysh 2 dúrkin chempıon atandy.
Mine, bizdiń myqty jigitterimiz osylaı qazaq elin jeńisti joldarymen álemge pash etip keledi. Endi, 6 maýsym túndigin túrýge jaqyn. Jańa maýsymnyń alǵashqy jekpe-jekteri qańtar aıynda Qaraǵandy oblysynan bastaý almaq.
Qazir «Astana arlandary» Aqbulaqta jańadan ashylǵan jattyǵý zalynda daıyndyq jumystaryn júrgizip jatyr.
Jaqynda AIBA uıymdastyratyn WSB jobasy 2016 jylǵy maýsymynyń jerebesi tartylyp, qaı komanda qandaı topta óner kórsetetini de belgili boldy. Bıyl qazaqstandyq «Astana arlandary» D tobynda óner kórsetedi.
Bizdiń topta ázerbaıjandyq «Baký ottary», Ózbekstan quramasy jáne Pýerto-Rıko boksshylary bar. Birden aıta keteıik, Ózbekstan quramasy bul jobaǵa bıyl birinshi ret qatysqaly otyr. Sondaı-aq, osy jobadaǵy eń myqty komanda qazaqstandyq «Astana arlandarymen» bir topta judyryqtaspaq. WSB aıasynda birinshi ret baqtaryn synaǵaly otyrǵan kórshilerimiz qandaı komanda jasaqtaǵanyn aldaǵy ýaqytta sharshy alań kórsetetin bolady. Qalǵan qarsylastarymyzdyń barlyǵy bizdiń jigitterimizge asa tańsyq emes.
«Arlandar» alǵashqy kezdesýin 23 qańtarda óz alańynda «Baký ottarymen» ótkizedi. 6 aqpanda Pýerto Rıkoǵa barady. Al 20 aqpanda Tashkentke bıylǵy maýsymnyń jańa músheleri ózbek boksshylarymen judyryqtasady. 4 naýryzda Bakýde jergilikti boksshylarmen rıngke shyǵady. Al 19 naýryzda Pýerto Rıko boksshylaryn óz sharshy alańynda qabyldaıdy. Toptaǵy sońǵy matchty Qazaqstanda 2 sáýirde Ózbekstan boksshylaryna qarsy ótedi.
Endi Búkilálemdik boks serııasynda el namysyn qorǵaıtyn «Astana arlandary» kásibı boks klýbynyń boksshylar quramy men klýbtyń bapkerlik quramyndaǵy ózgeristerge keleıik.
Jańa quram boıynsha endi 49 keli salmaqta «Astana arlandary» atynan Temirtas Júsipov, Mardan Berikbaev jáne Jomart Erjanǵa úmit artatyn bolamyz. 52 kelide Oljas Sáttibaev, Azat Mahmetov, Mıras Jaqypovtar el namysy úshin baryn salatyn bolady.
Meıirbolat Toıtov, Nursultan Kósheǵulov jáne Nurbol Qaljanov 56 keli salmaqta astanalyq klýbtyń abyroıyn asyrmaq. 60 kelide Zakır Safıýllın, Erjan Mýsafırov, Bekdáýlet Ibragımov, 64 kelide Samat Bashenov, Ashat Ýálıhanov, Sabyrjan Bekbergenovtarǵa senim artatyn bolamyz.
Aslan Shymbergenov, Qanaǵat Maralov, Bekzat Halmetov 69 keli salmaq boıynsha, Meıirim Nursultanov, Rýstam Svaev jáne Erik Áljanov 75 keli salmaq boıynsha el namysyn qorǵaıtyn bolady. Nurdáýlet Jarmanov, Alı Ahmedov, Arman Rysbek 81 kelide, Mujametjan Erkin, Rahman Áljanov 91 keli boıynsha óner kórsetpek. Al asa aýyr toqsan bir keliden joǵary salmaqta Qamshybek Qonqabaev, Nurjan Bekzatov, Nursultan Amanjolov sekildi bylǵary qolǵap sheberlerine úmit artatyn bolamyz.
Al, bıylǵy jańa maýsymda Nurlan Aqúrpekov atalmysh boks klýbynyń bas bapkeri bolyp iske kirispek. Myrzaǵalı Aıtjanov, Aleksandr Strelnıkov, Nurǵalı Safıýllın, Beıbit Esjanov, Núrken Andasov, Ermek Ertaev, Bolat Jumadilov jattyqtyrýshy quramda joǵarydaǵy boksshylardyń sheberligin shyńdaýǵa kirisedi.
«Astana Arlandarynyń» bıylǵy negizgi maqsaty - úshinshi márte WSB serııasynda chempıon ataný. Jerlesterimizdiń bıikterden kórinýine tilektespiz.
Kúnsultan Otarbaı
