Bes jylda jıyntyq ınvestıtsııa 400 mlrd AQSh dollaryna jetedi - UEM

ASTANA. KAZINFORM – 2029 jyly ınvestıtsııalardyń jalpy ishki óńimge qatynasy 23 paıyzǵa ulǵaıady. Bul týraly Úkimet otyrysynda Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.

- Ekonomıkalyq kúrdelilik ındeksi aıasynda 2024 jyldyń qorytyndysy boıynsha Qazaqstan álemniń 145 eli arasynda 55-oryndy ıelendi. Kórshiles eldermen salystyrǵanda, 2020-2024 jyldary Qazaqstan qarqyndy serpilis jasap, 87-orynnan 55-orynǵa kóterildi. Alǵa qoıylǵan mindetterdi iske asyrý úshin bizge ınvestıtsııalar kólemin ulǵaıtý qajet, - dedi vıtse-premer.

Onyń aıtýynsha, ulttyq jospardaǵy boljamdarǵa sáıkes ınvestıtsııalardyń jalpy ishki óńimge qatynasy qazirgi 14-15 paıyzdan 2029 jyly 23 paıyzǵa deıin ulǵaıady. 

- Nátıjesinde 2029 jyly negizgi kapıtalǵa salynatyn ınvestıtsııalar 2024 jylǵy deńgeımen salystyrǵanda 2,5 esege artýǵa tıis. Kórsetkishtiń 2029 jylǵa qaraı 23 paıyzǵa deıin kezeń-kezeńimen ósýi qosymsha 120 mlrd AQSh dollary mólsherinde qosymsha ınvestıtsııalar tartýǵa múmkindik beredi. Osylaısha, 2025–2029 jyldar aralyǵyndaǵy jıyntyq ınvestıtsııalar 400 mlrd AQSh dollaryna jetedi, - dedi Serik Jumanǵarın.

Aıta keteıik, Úkimet otyrysynda ekonomıkany odan ary ártaraptandyrý tásilderi pysyqtalyp jatyr.