Bes jylda jeńil ónerkásip salasynda 3 myń jumys orny quryldy
ASTANA. KAZINFORM – Bıyl jeńil ónerkásip salasynda 9 iri ınvestıtsııalyq joba iske asyrylady. Bul týraly QR Ónerkásip jáne qurylys mınıstrligi Ónerkásip komıteti tóraǵasynyń orynbasary Muhamed Andaqov aıtyp berdi.
− Sońǵy 5 jylda jeńil ónerkásip salasynda 3 myń jańa jumys orny qurylyp 40-tan astam joba iske qosyldy. Onyń ishinde, Shymkent qalasynda kilem óndirisin keńeıtý jobasy, Batys Qazaqstan oblysynda bıg-begter óndirisi boıynsha jańa joba, Atyraý oblysynda geotekstıldi klaster jobasy júzege asyryldy. Bul polıefırli geotekstıl jol qurylysynda, kóktemgi sý tasqyny kezinde jaǵalaýlardy nyǵaıtýda, gıdrooqshaýlaýda, qurylymdardy bekitýde jáne jerasty kommýnıkatsııalaryn qorǵaýda qoldanylady, − dedi M. Andaqov Ortalyq kommýnıkatsııalar qyzmetinde ótken baspasóz máslıhatynda.
Spıkerdiń aıtýynsha, 2025 jyly 600-ge jýyq jumys ornyn quryp, 9 ınvestıtsııalyq jobany iske asyrý josparlanýda. Onyń ishinde Aqtóbe oblysyndaǵy júndi tereń óńdeý jobasy, Túrkistan oblysyndaǵy toqyma buıymdaryn óndiretin maqta kesheni jáne Shymkenttegi toqylǵan shulyq óndirý jobasy bar.
− Salany qoldaý maqsatynda jeńil ónerkásip jobalaryn «Ónerkásipti damytý qory» AQ arqyly jeńildetilgen qarjylandyrý kózdelgen. Jeńil ónerkásipti damytý jáne maqta-toqyma klasterin qurý boıynsha 2022-2025 jyldarǵa arnalǵan jeńil ónerkásipti damytý jáne maqta-toqyma klasterin qurý boıynsha jol kartasy iske asyrylýda. Jeńil ónerkásipti damytý jónindegi jol kartalary kelesi negizgi is-sharalardy qamtıdy: memlekettik qoldaý sharalary, ınfraqurylymdy damytý, kásipkerlikti jáne básekege qabilettilikti arttyrý, kadrlyq áleýetti, eksporttyq áleýetti arttyrý qarastyrylǵan, − deıdi komıtet ókili.
Aıta keteıik, ótken jyly Qazaqstannyń jeńil ónerkásip naryǵy 4,3 mlrd AQSh dollary bolyp, onda otandyq óndirýshilerdiń úlesi shamamen 6% boldy. Elimizde jeńil ónerkásipte 1411 kásiporyn, 803 tigin kásiporyny, 481 toqyma buıymdaryn óndirý jáne 122 bylǵary ónimderi kásiporyndary jumys isteıdi.