Bes jylda bilim-ǵylym salasyna salynǵan ınvestıtsııa bes ese ósti – Prezıdent

ASTANA. KAZINFORM —  Bul týraly Memleket basshysy Ǵylym jáne tehnologııalar jónindegi ulttyq keńestiń otyrysynda aıtty. 

Prezıdent elimizdiń keleshegi jarqyn bolǵanyn qalasaq, joǵary tehnologııa men jasandy ıntellektini qazirden bastap tıimdi paıdalaný kerek ekenin atap ótti.

– Sondyqtan sońǵy jyldary ulttyq ǵylymdy damytýǵa aıryqsha kóńil bólip jatyrmyz. Bes jylda bilim-ǵylym salasyna salynǵan ınvestıtsııa bes ese ósti. Zertteý ýnıversıtetteri kóbeıýde, olardyń óndirispen baılanysy nyǵaıyp keledi. Qazir 300-ge jýyq kommertsııalyq joba qolǵa alyndy. Osylaısha, «Ýnıversıtet – zertteý – ınnovatsııa – kommertsııa» keshendi júıesi ornyǵyp jatyr. Bul úrdiske kúshti serpin berip, ony taıaý arada tolyǵymen engizý kerek. Álemniń 40 bedeldi joǵary oqý ornymen seriktestik ornattyq. Búginde elimizde 33 fılıal ashyldy. Tehnologııa parkteri jáne ınjınırıng ortalyqtary qurylýda. Ulttyq Ǵylym akademııasynyń bedeli nyǵaıa túsetin boldy. Ár aımaqta Ǵylym jónindegi keńester jumysqa kiristi. Ǵalymdardyń múddesin qorǵaýǵa basa mán berip otyrmyz. «Ǵylym jáne tehnologııalyq saıasat týraly» jańa zań qabyldandy, ǵylymdy basqarýdyń jańa quqyqtyq negizi qalandy. Ulttyq ǵylymnyń kadrlyq áleýetin nyǵaıtý, bul – asa mańyzdy, túıindi másele, ony basty nazarda ustaý qajet. Jas ǵalymdarǵa barynsha jaǵdaı jasala berýi kerek. Jalpy, alda áli de kóp jumys bar, bul jumysqa bárimiz birge jumylyp, bir ujym bolyp, tııanaqty qatysýymyz kerek. Áıtpese, kúre joldyń shetinde qalyp qoıamyz, – dedi Memleket basshysy. 

Aıta ketelik Qasym-Jomart Toqaev ǵylym men tehnologııa barlyq memleketter úshin strategııalyq mańyzy bar másele ekenine nazar aýdarǵan edi.