Bes jylda 1 mln-ǵa jýyq qazaqstandyq jasandy ıntellektini meńgeredi

ASTANA. KAZINFORM — Elimizde AI Movement: «Jasandy ıntellekt – barshaǵa» atty aýqymdy ulttyq bastama qolǵa alyndy. Tolyǵyraq «ASTANA HUB» basqarýshy dırektory Danııa Ahmetova aıtyp berdi.

— Adam kapıtalynyń damýy — Qazaqstan memlekettik strategııasynyń basty basymdyqtarynyń biri. Sondyqtan biz árbir azamattyń zamanaýı bilim men daǵdyny, ásirese jasandy ıntellektini meńgerýine erekshe kóńil bólemiz. Jasandy ıntellekt — bul jaı ǵana tehnologııa emes, bul XXI ǵasyrdaǵy saýattyń jańa túri. Ony meńgergen adamnyń bolashaǵy zor. 1 mıllıon azamatty jasandy ıntellektimen jumys isteý daǵdysyna úıretý, birneshe quzyrly organnyń birlesken strategııalyq bastamasy, — dedi Danııa Ahmetova ortalyq kommýnıkatsııalar qyzmeti alańynda ótken baspasóz máslıhatynda.

Qazaqstanda aldaǵy 5 jyl ishinde kimderdi jáne qansha adamdy jasandy ıntellektige baýlıdy:

— 500 000 oqýshy;

— 300 000 stýdent;

— 90 000 memlekettik qyzmetshi;

— 80 000 bıznes ókilderi.

— Maqsat — tehnologııalardy tek tutynýshy emes, ony jasap, tıimdi qoldana alatyn býyndy qalyptastyrý. AI Movement: «Jasandy ıntellekt — barshaǵa» ataýymen aýqymdy ulttyq bastamany qolǵa aldyq. Bul bastama Astana Hub arqyly iske qosylǵan jáne JI-di árbir qazaqstandyq úshin, ıaǵnı jasyna, kásibi nemese turatyn jerine qaramastan qoljetimdi etýge baǵyttalǵan, — deıdi Astana Hub basshysy.

Aıta keteıik, Qazaqstan Chat GPT sekildi óz jasandy ıntellektin jasap shyǵarmaq. Aqyldy júıe KazLLM dep atalady. 

Sondaı-aq Prezıdent janyndaǵy Jasandy ıntellekt jóninde keńestiń quramynda kimder bolatynyn habarlaǵan edik. 

Odan bólek, jasandy ıntellektiniń kómegimen qıyn jaǵdaıdaǵy otbasyn qoldaý tetigi engizilmek.