Bes jyl ishinde 1 mıllıon adamdy jasandy ıntellekt daǵdylaryna úıretý kerek - Prezıdent

ASTANA. KAZINFORM - Taǵy bir mańyzdy mindet – derekterdi sapaly túrde tsıfrlyq formatqa kóshirý jáne júıeleý. Úkimetke derekter jıyntyǵyn qalyptastyrý baǵytynda shara qabyldaý tapsyryldy. Bul týraly Memleket basshysy Qasym-Jomart Toqaev Toqaev AIemai halyqaralyq jasandy ıntellekt ortalyǵynaa barǵanda aıtty, dep habarlaıdy Aqordanyń baspasóz qyzmeti.

Memleket basshysy ol memlekettiń, bıznestiń jáne JI-ǵa qyzyǵýshylyǵy zor azamattardyń jasandy ıntellekt modelderin oılap tabýyna, bilim alýyna jáne damýyna jol ashady.

– Bul salada tyńǵylyqty atqarylǵan istiń bir mysaly – KazLLM til modeli. Biz jasandy ıntelektti qazaqsha oılaýǵa, saraptaýǵa jáne sóıleýge úırettik. Bul aıtarlyqtaı jetistik qazaq tilin tsıfrlyq ortada damytý úshin zor múmkindik beredi. Bastalǵan úlken isti jalǵastyrý kerek. Aldymyzda túrli sıpattaǵy derekterdi bir mezette qoldana alatyn Qazaq tiliniń mýltımodaldy tildik modelin jasaý mindeti tur. Úkimetke osy baǵyttaǵy jobalardy qarjylandyrý máselesin pysyqtaýdy tapsyramyn, – dedi Memleket basshysy.

Prezıdent azamattardyń jasandy ıntellekt salasyndaǵy saýatyn ashyp, biliktiligin arttyrý qajet ekenine nazar aýdardy.

Qasym-Jomart Toqaevtyń aıtýynsha, bes jyl ishinde 1 mıllıon adamdy jasandy ıntellekt daǵdylaryna úıretý mindetine erekshe kóńil bólgen jón. Oqýshylarǵa, stýdentterge, memlekettik qyzmetkerler men kásipkerlerge arnalǵan baǵdarlamaǵa barynsha qoldaý kórsetilýge tıis.

– JI tehnologııalary salasyndaǵy otandyq jáne halyqaralyq bilim berý baǵdarlamalary elimizdiń kadrlyq áleýetin arttyrýǵa úles qosa alady. Úkimetke jasandy ıntellekt baǵytynda maman daıarlaýǵa arnalǵan AI-Sana baǵdarlamasyn kezeń-kezeńimen júzege asyrý máselesin qarastyrýdy tapsyramyn. Atalǵan baǵdarlama oqý, zertteý jáne startaptardy ázirleý úderisteri toǵysatyn dınamıkalyq ekojúıeni qalyptastyrýǵa yqpal etýge tıis. Álemniń jetekshi ýnıversıtetteriniń akseleratsııa tájirıbesin qoldanǵan durys. Jasandy ıntellekttiń paıdasyn Qazaqstannyń árbir turǵyny bilýi kerek. Onyń ne úshin qajet ekenin, qalaı durys qoldanylatynyn yjdahattyqpen túsindirgen jón, – dedi Prezıdent.

Úkimetke azamattardyń jasandy ıntellektti kúndelikti qoldanýyna arnalǵan mehanızmderdi engizý sharalaryn qabyldaý mindeti júkteldi.

– Qazaqstannyń ınnovatsııa men ozyq tehnologııany damytý isinde kósh bastaýǵa mol múmkindigi bar. Tsıfrlandyrý jáne jasandy ıntellektti keńinen engizý elimizdiń qaryshtap damýyna kepil bolýǵa tıis. Mundaı órshil maqsatqa qol jetkizýge qaýqarymyz jetedi. Men oǵan senimdimin, – dedi Qasym-Jomart Toqaev.

Osyǵan deıin Prezıdentke jasandy ıntellekt salasyndaǵy otandyq ónimder tanystyrylǵany týraly habarladyq.