Bes ońtústik óńirge sý paıdalaný lımıti bekitildi
ASTANA. KAZINFORM – Bıylǵy sýarý maýsymynda bes ońtústik óńirge sý paıdalaný lımıti bekitildi. Lımıtter egis alqaptarynyń qurylymy men sý sharýashylyǵynyń maýsym basyndaǵy jaı-kúıi eskerile otyryp aıqyndaldy. Bul týraly Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov Ortalyq kommýnıkatsııalar qyzmetinde ótken brıfıngte málimdedi.
Komıtet tóraǵasynyń aıtýynsha, Memleket basshysynyń aýyl sharýashylyǵynyń jalpy ónim kólemin eki esege ulǵaıtý jónindegi tapsyrmasyn iske asyrý aıasynda Aýyl sharýashylyǵy mınıstrligimen birlesip, 2024–2028 jyldarǵa arnalǵan ylǵalsúıgish daqyldardyń, onyń ishinde kúrish egistiginiń kólemin qysqartýdy kózdeıtin Jol kartasy bekitilgen.
– Osy Jol kartasynda belgilengen egis qurylymy men sý sharýashylyǵynyń maýsym basyndaǵy jaı-kúıine sáıkes Qyzylorda oblysyna 3,2 mlrd tekshe metr, Túrkistan oblysyna 3,8 mlrd tekshe metr, Almaty oblysyna 2,1 mlrd tekshe metr, Jetisý oblysyna 1,8 mlrd tekshe metr, al Jambyl oblysyna 900 mln tekshe metr sý paıdalaný lımıti bekitildi, – dedi Seıilbek Nurymbetov.
Onyń aıtýynsha, qabyldanǵan sharalar sý resýrstaryn tıimdi josparlaýǵa jáne vegetatsııalyq kezeńde óńirlerdi qajetti sýmen qamtamasyz etýge múmkindik beredi.
Eske salaıyq, buǵan deıin elimizde sý sharýashylyǵyn jańǵyrtý aıasynda jańa Sý kodeksi qabyldanyp, sý ınfraqurylymyn jańartý jumystary qolǵa alynǵany týraly jazǵan edik.
