Bes óńirde ekinshi aýysymdaǵy sabaqtar qashyqtan oqytý formatyna aýystyryldy

PETROPAVL. KAZINFORM – Elimizdiń birqatar qalasynda qatty aıaz saldarynan oqýshylar ekinshi aýysymda onlaın oqytýǵa aýystyryldy. Tolyǵyraq Kazinform agenttigi tilshisiniń materıalynda.

24 qańtarda Astanada qatty aıaz saldarynan 0-9 synyp oqýshylary úshin ekinshi aýysymdaǵy sabaqtar toqtatyldy. Olar qashyqtan oqytý formatynda oqıtyn bolady. 10-11 synyp oqýshylary shtattyq rejımde oqıdy.

Qostanaı oblysy Uzynkól aýdanynyń oqýshylary da onlaın formatqa kóshti. Aýdandaǵy alty mekteptiń bastaýysh synyp oqýshylary ekinshi aýysymda «qashyqtyqqa» kóshirildi. Orta jáne joǵary synyptar dástúrli túrde oqıdy.

Qaraǵandy oblysynda aýa temperatýrasy -32-ge deıin tómendeýine baılanysty 0-11 synyp oqýshylary úshin sabaqtar toqtatyldy. Búginde óńirdegi barlyq oqýshy úıde oqıdy.

Pavlodarda mektepaldy daıarlyq synyptarynyń, 1-4 synyp oqýshylarynyń ekinshi aýysymdaǵy sabaqtary qashyqtan oqytý formatyna kóshiriledi. Qalada aýa temperatýrasy -25 gradýsqa jetti.

Ekibastuzda da aýa raıynyń qolaısyzdyǵy baıqalady. Saldarynan qalada 0-9 synyp oqýshylary sabaqqa úılerinen qosylady. Qalǵan oqýshylar shtattyq rejımde oqıdy. 

Óskemende ekinshi aýysymda oqıtyn barlyq oqýshy qashyqtan oqý formatyna kóshirildi. Bilim bólimi habarlaǵandaı, barlyq mektepte barlyq synyp úshin sabaqtar onlaın-formatqa aýystyryldy.

Buǵan deıin elimizdiń birneshe óńirinde ekinshi aýysymdaǵy synyptar onlaın oqıtynyn habarlaǵan edik.