Bes oblysta jaýyn-shashynnyń saldarynan jaǵdaı qıyndaı túsýi múmkin - Qazgıdromet
NUR-SULTAN. QazAqparat - Qazaqstanda bes oblystaǵy eldi mekenderge sý basyp qalý qaýpi tónip tur, dep xabarlaıdy QazAqparat tilshisi.
QR ІІM Tótenshe jaǵdaılar komıteti tóraǵasynyń orynbasary Marat Kúldikovtiń aıtýynsha, atalǵan aımaqtardyń ishinde Batys Qazaqstan, Aqmola, Shyǵys Qazaqstan, Qostanaı men Qaraǵandy oblystary bar.
«1 sáýir 18:00-degi jaǵdaı boıynsha dál osy oblystarda sý basý qaýpi joǵary bolyp tur. Sosyn Qazgıdromettiń boljamy boıynsha 1-5 sáýir kúnderi Qostanaı, Soltústik Qazaqstan, Shyǵys Qazaqstan, Aqmola men Qaraǵandy oblystaryna kóp mólsherde jaýyn-shashyn túsedi. Sonyń saldarynan qazirgi jaǵdaı qıyndaı túsedi. Budan bólek, Shyǵys Qazaqstanda daýyldy eskertý jarııalandy. Aýa temperatýrasy da kóteriledi. Osynyń nátıjesinde ózen sýlarynyń deńgeıi kúrt kóteriledi degen boljam bar», - dedi M.Kúldikov Astanadaǵy shuǵyl baspasóz máslıxatynda.
Aıta keteıik, búgin Soltústik Qazaqstan oblysyndaǵy Qaratal aýylynyń turǵyndaryn qaýipsiz jerge kóshirý sharalary bastaldy. Sileti qoımasynan sýdyń kóptep jiberilýine baılanysty SQO-nyń Qaratal men Quldykól aýyldaryn sý basýy múmkin. Qazirgi kezde Sileti sý qoımasy 95 paıyzǵa tolyp tur.
«Búgin kúndiz saǵat 12:00-den bastap biz Qarataldyń turǵyndaryn aldyn ala qaýipsiz jerge kóshirý bastaldy. Osy ýaqytqa deıin tikushaqpen 33 adam evakýatsııalandy. Sosyn týǵan-týystardyń úıine jáne mekteptegi arnaıy evakýatsııalyq beketke kóship jatqandar da bar. Budan bólek, 2 754 maldy qaýipsiz jerge aıdalyp ákelindi», - dep atap kórsetti M.Kúldikov.
