Bes oblysta fıtosanıtarııalyq saraptamanyń jańa aqyly tártibi pılottyq rejımde iske qosyldy
ASTANA. KAZINFORM – 2025 jylǵy 24 qarashadan bastap Shyǵys Qazaqstan, Mańǵystaý, Túrkistan, Abaı jáne Jetisý oblystarynda karantındik fıtosanıtarııalyq saraptamany aqyly negizde júrgizýdiń jańa tártibi pılottyq rejımde engizildi. Bul týraly
Halyqaralyq saýdanyń ósýi jáne aýyl sharýashylyǵy ónimderiniń aınalymynyń artýy jaǵdaıynda fıtosanıtarııalyq qaýipsizdik máseleleri erekshe mańyzǵa ıe bolyp otyr. Zerthanalyq zertteýlerdi qosa alǵanda, karantınge jatqyzylatyn ónimdi tıimdi baqylaý — ishki naryqty qorǵaýdyń jáne azyq-túlik qaýipsizdigin qamtamasyz etýdiń mańyzdy quraly.
— 2025 jylǵy 24 qarashadan bastap Shyǵys Qazaqstan, Mańǵystaý, Túrkistan, Abaı jáne Jetisý oblystarynda karantındik fıtosanıtarııalyq saraptamany aqyly negizde júrgizýdiń jańa tártibi pılottyq rejımde engizildi. Bul sheshim Ózbekstan, Ázerbaıjan, Qytaı, Belarýs jáne Reseı tájirıbesin eskere otyryp qabyldandy jáne kórshiles memlekettermen teń jaǵdaı qalyptastyrýǵa baǵyttalǵan. Saraptamany «Fıtosanıtarııa» ShJQ RMK júrgizedi, — delingen AShM habarlamasynda.
Jańa tártiptiń tıimdi jumys isteýi úshin atalǵan oblystarǵa karantınge jatqyzylatyn ónim jetkiziletin baqylaý pýnktteri aıqyndaldy. Eksporttalatyn ónimge arnalǵan zerthanalyq saraptama elimizdiń barlyq óńirinde uıymdastyrylǵan.
Tártipti engizýge deıin syrtqy saýda qyzmetine qatysýshylarmen túsindirý kezdesýleri ótkizildi. Terrıtorııalyq bólimsheler men zerthanalardyń mamandary qajetti oqytý kýrsynan ótti. Inspektsııa basshylaryna saraptamalardyń sapaly jáne ýaqytyly júrgizilýin qamtamasyz etý tapsyryldy.
Jańa tártip fıtosanıtarııalyq qyzmetterdiń sapasyn arttyrýǵa múmkindik beredi dep kútilýde. Saraptamalardan túsetin qarajat salany damytýǵa — zerthanalyq jabdyqtardy jańartýǵa, materıaldyq-tehnıkalyq bazany nyǵaıtýǵa jáne mamandardyń biliktiligin arttyrýǵa baǵyttalatyn bolady.
Aıta ketelik Qazaqstan, Ózbekstan jáne Qyrǵyzstannyń fıtosanıtarııalyq qyzmetteri kúsh biriktirmek.