Bes oblysta 6 myńnan astam úı sýda tur – QR TJM
ASTANA. KAZINFORM – Sý basý qaýpi bar aımaqtarda turǵyndar men janýarlar aldyn ala evakýatsııalanyp jatyr. Bul týraly QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash aıtyp berdi.
«Jedel sharalardyń arqasynda TJ aımaqtarynan turǵyndar men janýarlardy evakýatsııalaý aldyn ala júrgizildi. Sý tasqyny bastalǵaly beri barlyǵy 117 800 adam, onyń ishinde 43 931 bala qutqarylyp, evakýatsııalandy. Júrgizilgen sý tasqynyna qarsy is-sharalar arqasynda 19 071 adam óz úılerine oraldy. 113 852 mal qaýipsiz jerge aıdaldy. 8 914 adam, onyń ishinde 4 019 bala evakýatsııalaý pýnktterinde», - dedi E.Saıpash Ortalyq kommýnıkatsııalar qyzmetinde.
Onyń aıtýynsha, 4 237 turǵyn úı men 2 698 aýla aýmaǵynan sýdyń baǵyty buryldy. 10,2 mln astam tekshe metr erigen qar sýy soryp shyǵaryldy, 3,2 mln qapshyq jáne 1,4 mln astam tonna ınertti materıal tóseldi.
Qazirgi ýaqytta Aqtóbe, Qostanaı, Aqmola, Atyraý, Soltústik Qazaqstan oblystarynda 6 046 jeke turǵyn úı, 1 130 aýla aýmaǵyn sý basqan. Sý tasqyny qaýipti óńirlerde avarııalyq-qutqarý jumystary, sý tasqynyna qarsy is-sharalar, sý tasqyny saldaryn joıý jumystary jalǵasyp jatyr. Oǵan 44 121 adam, 4 610 tehnıka, 858 sý sorý quraly, 339 júzý quraly, 16 áýe kemesi jumyldyryldy. Sondaı-aq volonterler de belsendi qatysyp jatyr.
«Sý basý qaýpine baılanysty Soltústik Qazaqstan oblysynyń Tımırıazev aýyldarynan, Qyzyljar aýdanynyń Sokolovka, Barnevka, Dolmatov aýyldarynan, Petropavl qalasynyń Podgora, Kojevennyı shaǵyn aýdandarynan, Zarechnyı kentinen, Aqmola oblysy Jarqaıyń aýdanynyń Lvovskoe aýylynan, Aqtóbe oblysynyń Yrǵyz aýdanynda Kuılys jáne Nura aýyldarynan, Batys Qazaqstan oblysy Qaratóbe jáne Kaztalov aýdandarynyń Qaratóbe jáne Jalpaqtal aýyldarynan, Qostanaı oblysy Jangeldi aýdanynyń Baıtursynov aýylynan 2 475 turǵyn aldyn ala evakýatsııalandy jáne jóneltildi», - dedi spıker.