Bes myńnan astam úı sý astynda qalyp otyr – QR TJM

ASTANA. KAZINFORM – QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash eldegi sý tasqyny boıynsha jańa derekterdi baıandady.

Onyń aıtýynsha, ózenderde muz jarý, erigen qar sýyn burý, ınertti materıaldar salynǵan qaptar tóseý, kanaldardyń jaǵalaryn nyǵaıtý jumystary, aryq júıelerin tazalaý, qulaqtandyrý jáne adamdardy qaýipsiz jerlerge evakýatsııalaý jumystary jalǵasýda.

«Sý tasqyny bastalǵaly beri barlyǵy 111 194 adam, onyń ishinde 39 222 bala qutqarylyp, evakýatsııalandy, 107 613 mal qaýipsizdik jerge aıdaldy. TJM psıhologtary jergilikti jerlerde azamattarǵa jáne jedel jeli telefondary arqyly shuǵyl psıhologııalyq kómek kórsetýdi jalǵastyrýda. Búgingi kúnge deıin jedel jelige túsken 1 728 qońyraý pysyqtaldy», - dedi spıker Respýblıkalyq aqparattyq shtabta ótken brıfıngide.

Búgingi kúni 11 950 adam óz úılerine oraldy, 6 746 adam, onyń ishinde 2 967 bala evakýatsııalaý pýnktterine ornalasqan. Jumyldyrylǵan kúshter men quraldar 9,5 mln tekshe metr erigen qar sýy soryp shyǵardy, 2,2 mln qapshyq jáne 1,2 mln tonna ınertti materıal tósedi. 3 511 turǵyn úı men 2 157 aýla aýmaǵynan sý buryldy. Avarııalyq-qutqarý jáne sý tasqynyna qarsy jumystarǵa 33 101 adam, 4 182 tehnıka, 853 sý sorý quraly, 335 júzý quraly, 10 áýe kemesi jumyldyryldy.

«Osy saǵatta Aqtóbe, Qostanaı, Aqmola, Atyraý, Soltústik Qazaqstan oblystarynda 5 414 jeke turǵyn úı, 1 617 aýla aýmaǵy jáne 2 035 saıajaı úıleri sý astynda qalyp otyr. Zardap shekken óńirlerge 1 400 tonnadan astam gýmanıtarlyq kómek jetkizildi», - dedi E.Saıpash.

Elimizdiń 8 óńirinde Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 37 TJ rejımi engizilgen.