Bes myńnan astam adamnyń qarjysyn tartqan «HAS» qarjy pıramıdasyn uıymdastyrýshylar sottaldy

ASTANA. KAZINFORM – Ózderin syrtqy ekonomıkalyq qyzmetpen aınalysatyn kompanııa retinde tanystyrǵan kúdiktiler azamattardy túrli ınvestıtsııalyq jobalarǵa aqsha salýǵa úgittep, aı saıyn 70%-ǵa deıin passıvti tabys alýǵa ýáde bergen, dep habarlaıdy QR Qarjylyq monıtorıng agenttiginiń baspasóz qyzmeti.

Baspasóz qyzmetiniń málimetterine qaraǵanda, áleýmettik jelilerde jalǵan aktsııalar belsendi túrde jarııalanyp, onyń ishinde Astana men Qosshy qalalarynda turǵyn úı salý týraly aqparat taralǵan.

Belsendi qurylys ıllıýzııasyn jasaý úshin dekoratsııalar men arnaıy tehnıka jaldanǵan.

Nátıjesinde qarjylyq pıramıdaǵa 5 myńnan astam salymshy tirkelgen.

Sot 5 qatysýshyny 6 jyldan 12 jylǵa deıin bas bostandyǵynan aıyrýǵa úkim shyǵardy.

Sonymen qatar, zardap shekkenderge keltirilgen zııandy óteý úshin salymshylardyń aqshasyna alynǵan 1 mıllıardtan astam teńge quny bar múlik tárkilendi.

Aktıvter qatarynda — 4 páter, 18 avtokólik, 3 jer ýchaskesi, avtoturaq oryndary, kommertsııalyq emes ǵımarat jáne esepshottardaǵy aqsha qarajattary bar.

Aıta keteıik, Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty iske qosýly.

Osyǵan deıin QMA 250 adam 300 mıllıonǵa jýyq teńge salǵan «Buyers Union» qarjy pıramıdasynyń jumysyn toqtatqanyn habarlady.