Bes mıllıonnan astam qazaqstandyq Nursultan Nazarbaevtyń basshy bolýyn qalap otyr - senator B.Dosmambetov
ASTANA. 3 aqpan. QazAqparat /Aıdar Ospanalıev/ - «Bes mıllıonnan astam qazaqstandyq Nursultan Nazarbaevtyń basshy bolýyn qalap otyr», - deıdi senator Baqbergen Dosmambetov.
Bul pikirin depýtat búgin Parlament Senatynyń jalpy otyrysynan soń jýrnalısterge bergen suhbatynda bildirdi.
«Osyǵan deıin 5 mıllıonnan astam qazaqstandyqtyń Elbasynyń ókilettigin uzartý týraly bastama kótergeni belgili. Ol usynys Parlamentte, sodan soń Konstıtýtsııalyq keńeste qaraldy. Bastama Ata zańymyzǵa qarama-qaıshy bolyp shyqty. Al Elbasymyz bir jaǵy osynshama halyqtyń oılaǵan maqsatyn jerge tastamaı, bir jaǵy
óziniń Konstıtýtsııanyń kepili retindegi oǵan qarsy qadamdarǵa barmaıtyndyǵyn kórsete otyryp, ekijaqty biriktiretin usynys jasady. Sóıtip elde kezekten tys saılaý ótetin boldy»,-dedi depýtat.
Onyń sózine qaraǵanda, keshe Parlamenttiń birlesken otyrysynda osy saılaýǵa negiz bolatyn tıisti qujattar maquldanyp, búgin Senatta osy qujattar biraýyzdan qabyldandy. «Halyq ózin 20 jyl basqarǵan basshysynyń qolynan is keletin, kóregendi, bilikti basshy ekendigine
kóz jetkizgennen keıin, sapaly ómirge qoldary jetkennen keıin ǵana Memleket basshysynyń aıtqandaryna toqtalyp, Prezıdentke senip otyr. Al Memleket basshysynyń bastamasymen qolǵa alynǵan qazirgi tańdaǵy baǵdarlamalar iske asyp jatsa, Qazaqstan halqy budan da jaqsy ómir súretin bolady»,-dedi B.Dosmambetov.
